لاہور ہائیکورٹ نے سانحہ مری کیس کا فیصلہ سنا دیا

لاہور ہائیکورٹ روالپنڈی بینچ نے سانحہ مری کیس کا فیصلہ سنا دیا ہے۔ تفصیلات کے مطابق سانحہ مری کیس میں لاہور ہائی کورٹ راولپنڈی بینچ کے جسٹس چودھری عبدالعزیز نے 4 ماہ قبل محفوظ کیا گیا فیصلہ سنا دیا۔ ذرائع کے مطابق 80 صفحات پر مشتمل تفصیلی فیصلہ پیر 7 نومبر کو جاری ہو گا۔ فیصلے میں عدالت نے قرار دیا کہ ریسکیو 1122، ہائی وے ڈیپارٹمنٹ اور ڈیزاسٹر مینجمنٹ سانحے کے ذمے دار ہیں۔ فیصلے میں کہا گیا ہے کہ مری میں تمام غیر قانونی عمارتیں مسمار ہوں گی جب کہ تمام کمرشل تعمیرات پر پابندی لگا دی گئی ہے۔ عدالت نے حکم دیا کہ ہوٹلز کا میکنزم بنایا جائے اور مری کے ہوٹلز،گیسٹ ہاوٴسز کی کیٹگریز بنا کر کرایے مقرر کیے جائیں۔ عدالت نے اپنے فیصلے میں کہا کہ سانحہ مری کے شہدا کا معاوضہ8لاکھ روپے کم ہے، اسے بڑھایا جائے۔ صفائی،سیوریج،نالہ صفائی کے لیے الگ محکمہ بنایا جائے اور جن افسران کو محکمہ موسمیات کی برف باری سے متعلق رپورٹ کا علم تھا، ان کے خلاف فوری سخت قانونی کارروائی کی جائے۔ فیصلے میں قرار دیا گیا ہے کہ سانحہ کے بعد جنہیں بلا جواز معطل کیا گیا، ان کے خلاف کسی قسم کی کوئی کارروائی نہیں ہو گی۔ ذمہ دار قرار دیے گئے ریسکیو1122،ہائی وے اور پنجاب ڈیزاسٹر مینجمنٹ کے افسران خلاف کارروائی کی جائے۔ خیال رہے کہ 7 اور 8 جنوری کو پیش آنے والے سانحہ مری میں 23 افراد جاں بحق ہو گئے تھے۔