عوام خبردار رہیں، پاکستان میں کورونا کی نئی قسم آگئی

دنیا بھر میں عالمی وبا کورونا وائرس کے خطرات ابھی تک منڈلا رہے ہیں۔ پاکستانیوں کیلئے بری خبر ہے کہ یہاں بھی اس موذی مرض کی نئی قسم آ چکی ہے۔ عوام کو سخت اور لازمی احتیاطی تدابیر اختیار کرنے کی ہدایات جاری کر دی گئی ہیں۔ میڈیا رپورٹس کے مطابق پاکستان میں کورونا وائرس کا سامنے آیا والا ویرئینٹ اومیکرون کی ذیلی قسم ہے۔ قومی ادارہ صحت نے اس کی تصدیق کر دی ہے۔ بیان میں کہا گیا ہے کہ نئے سب ویرینٹ کی تصدیق جینوم کی ترتیب کے ذریعے ہوئی ہے۔ قومی ادارہ صحت نے خبردار کیا ہے کہ کورونا وائرس کی نئی قسم کی وجہ سے مختلف ملکوں میں کیسوں کی تعداد میں روز بروز اضافہ ہو رہا ہے۔ عوام اگر اس سے بچنا چاہتے ہیں تو فوری اپنی ویکسی نیشن کرائیں، ہجوم میں جانے سے گریز کریں جبکہ ماسک کا استعمال لازمی اپنائیں۔ نیشنل انسٹی ٹیوٹ آف ہیلتھ کی جانب سے جاری بیان میں ویکسی نیشن کیساتھ ساتھ تمام شہریوں کو ہدایات جاری کی گئی ہیں کہ وہ چھ مہینوں کے اندر اندر بوسٹر ڈوز لازمی لگوائیں۔ https://twitter.com/NIH_Pakistan/status/1523583130954698752?s=20&t=8skT_u8Olx-73bBnAYLsWg خیال رہے کہ کچھ عرصہ قبل ورلڈ ہیلتھ آرگنائزیشن ( ڈبلیو ایچ او) کے سربراہ ٹیڈروس ایڈہانوم گیبریوس نے کورونا وائرس کی قسم اومیکرون کے بارے میں خبردار کرتے ہوئے کہا تھا کہ اسے عام مرض نہ سمجھا جائے۔ آج سے تقریباً 4 ماہ قبل ایک پریس کانفرنس میں ٹیڈروس ایڈہانوم گیبریوس نے کہا تھا کہ ریکارڈ تعداد کا کورونا کی نئی قسم سے متاثر ہونے کا مطلب ہے کہ میڈیکل عملے اور ہسپتالوں پر پریشر بڑھ رہا ہے۔ ان کا کہنا تھا کہ ڈیلٹا قسم کے مقابلے میں اومیکرون کی شدت کم ہے، خاص طور پر ایسے افراد جو اپنی ویکسی نیشن کرا چکے ہیں لیکن اس کا یہ ہرگز مطلب نہیں کہ یہ خطرناک نہیں ہے۔ سربراہ ڈبلیو ایچ او کا کہنا تھا کہ اومیکرون کی وجہ سے بھی لوگ ہسپتالوں میں داخل ہوئے اور کورونا کی دیگر اقدام کی طرح یہ بھی اموات کا باعث بھی بنا۔