ویب ڈیسک: نیشنل ہائی ویز اینڈ موٹروے پولیس (این ایچ ایم پی) نے بروقت کارروائی کرتے ہوئے موٹروے ایم-5 پر ایک مسافر بردار بس ڈرائیور کو غنودگی کے عالم میں گاڑی چلانے سے روک لیا۔
ترجمان موٹروے پولیس کے مطابق ڈیوٹی پر مامور اہلکاروں نے مسافر گاڑیوں کی ڈیش کیم فوٹیج کی نگرانی کے دوران ایک بس ڈرائیور کو مسلسل جماعیاں لیتے اور نیند میں جھکتے ہوئے دیکھا، جس پر فوری کارروائی کرتے ہوئے بس کو روک دیا گیا۔
پولیس نے بتایا کہ ڈرائیور کو چہرہ دھلوا کر ہوش میں لایا گیا اور نیند میں گاڑی چلانے کے خطرناک نتائج سے آگاہ کیا گیا۔ اس دوران اسے حفاظتی ہدایات بھی فراہم کی گئیں۔
موٹروے پولیس کے افسران نے مسافر بردار گاڑیوں میں نصب ڈیش کیم کی نگرانی کے دوران موٹروے ایم 5 پر بس ڈرائیورکوغنودگی کی حالت میں دیکھا جو جماعیاں لے رہا تھا۔ بس ڈرائیور کو روکا گیا اور چہرہ دھلوایا گیا۔ سیٹ بیلٹ نہ باندھنے اور نیند میں گاڑی چلانے پر قانونی کاروائی عمل میں لائی گئی pic.twitter.com/JHdASucs8y
— National Highways & Motorway Police (NHMP) (@NHMPofficial) November 12, 2025
ترجمان کے مطابق ڈرائیور نے سیٹ بیلٹ بھی نہیں باندھی ہوئی تھی، جس پر اس کے خلاف قانونی کارروائی عمل میں لائی گئی۔
موٹروے پولیس کا کہنا ہے کہ غنودگی یا نیند میں ڈرائیونگ نہ صرف ڈرائیور بلکہ مسافروں اور دیگر سڑک استعمال کرنے والوں کے لیے بھی شدید خطرہ بن سکتی ہے۔
ترجمان این ایچ ایم پی نے مسافروں سے اپیل کی کہ اگر وہ کسی ڈرائیور کو نیند یا لاپرواہی کے عالم میں گاڑی چلاتے دیکھیں تو فوراً ہیلپ لائن 130 پر اطلاع دیں۔
موٹروے پولیس نے واضح کیا کہ شہریوں کی جانوں کا تحفظ اولین ترجیح ہے، اسی مقصد کے تحت جدید نگرانی نظام اور ڈیش کیم فوٹیجز کے استعمال کو مزید مؤثر بنایا جا رہا ہے۔