(ویب ڈیسک) دنیا کے مقبول ترین میسجنگ پلیٹ فارم واٹس ایپ (WhatsApp) کی جانب سے صارفین کے اسٹیٹس (Status) فیچر کو مزید جدید اور آسان بنانے کے لیے ایک نئے فیچر کی آزمائش شروع کر دی گئی ہے، جس کے تحت اب صارفین بغیر کسی بیک گراؤنڈ فوٹو یا ویڈیو کے براہِ راست اپنی لوکیشن اسٹیٹس پر شیئر کر سکیں گے۔
واٹس ایپ کی اپ ڈیٹس پر نظر رکھنے والی معروف ویب سائٹ WABetaInfo کی رپورٹ کے مطابق موجودہ نظام میں اگر کوئی صارف واٹس ایپ اسٹیٹس پر اپنی لوکیشن شیئر کرنا چاہے تو اسے پہلے گیلری سے کوئی تصویر یا ویڈیو منتخب کرنی پڑتی ہے اور پھر اس کے اوپر ' لوکیشن اسٹیکر' لگانا پڑتا ہے۔
تاہم نئے فیچر کے آنے کے بعد کسی بیک گراؤنڈ امیج یا ویڈیو کی ضرورت باقی نہیں رہے گی، بلکہ اپ ڈیٹس (Updates) ٹیب میں براہِ راست ' لوکیشن' (Location) کا ایک علیحدہ آپشن دستیاب ہوگا۔
گرین پن کے ساتھ 'میپ کارڈ' اور پرائیویسی کنٹرول:
جیسے ہی صارف واٹس ایپ کو لوکیشن تک رسائی دے گا، اس کی موجودہ لوکیشن خودکار طور پر اسکرین پر ظاہر ہونے لگے گی جسے منظوری کے بعد اسٹیٹس پر پوسٹ کیا جا سکے گا، جبکہ صارفین اپنی موجودہ لوکیشن کے بجائے کسی دوسرے مقام کو مینوئلی (Manually) بھی منتخب کر سکیں گے۔
اس فیچر کی خاص بات یہ ہے کہ لوکیشن کسی عام اسٹیکر کے بجائے ایک پرکشش 'میپ کارڈ' (Map Card) کی شکل میں نظر آئے گی جس پر ایک گرین پن (Green Pin) لگا ہوگا۔
مزید برآں، جو صارفین پرائیویسی کے پیشِ نظر اپنا بالکل درست (Exact) مقام ظاہر نہیں کرنا چاہتے، وہ ڈیوائس کی سیٹنگز میں جا کر Approximate Location (تقریباً مقام) تک رسائی کو فعال کر سکیں گے۔
دستیابی:
رپورٹ کے مطابق فی الحال اس نئے فیچر کی آزمائش اینڈرائیڈ ڈیوائسز کے لیے واٹس ایپ کے بیٹا (Beta) ورژن میں جاری ہے اور تمام صارفین کے لیے اس کے باقاعدہ اجرا کی حتمی تاریخ کا اعلان ابھی نہیں کیا گیا، تاہم دیگر اسٹیٹس اپ ڈیٹس کی طرح یہ لوکیشن اسٹیٹس بھی 24 گھنٹے بعد خودکار طور پر غائب ہو جائے گا۔