سلیم خان آئی سی یو میں منتقل، سلمان خان سمیت اہلِ خانہ اسپتال پہنچ گئے

ویب ڈیسک: معروف بھارتی اسکرین رائٹر سلیم خان کو طبیعت ناساز ہونے پر ممبئی کے لیلاوتی اسپتال میں داخل کر دیا گیا ہے، جہاں وہ آئی سی یو میں زیرِ علاج ہیں۔ ان کی بیماری کی نوعیت سے متعلق فوری طور پر کوئی تفصیل جاری نہیں کی گئی۔

خبر سامنے آتے ہی ان کے صاحبزادے اور بالی ووڈ اداکار سلمان خان سمیت اہلِ خانہ اسپتال پہنچ گئے۔ میڈیا رپورٹس کے مطابق سلمان خان نے والد کی عیادت کی اور کچھ دیر بعد بغیر گفتگو کے روانہ ہو گئے۔ الویرا خان اگنی ہوتری اور اتل اگنی ہوتری بھی اسپتال میں موجود تھے۔

سوشل میڈیا پر مداحوں اور شوبز شخصیات کی جانب سے سلیم خان کی جلد صحت یابی کے لیے دعاؤں کا سلسلہ جاری ہے۔

سلیم خان بھارتی فلم انڈسٹری کے ممتاز مصنف ہیں، جنہوں نے جاوید اختر  کے ساتھ مل کر 1970 اور 80 کی دہائی میں متعدد کامیاب فلمیں تحریر کیں، جن میں Zanjeer، Deewaar اور Don شامل ہیں۔ ان فلموں نے بھارتی سینما میں ایک نیا رجحان متعارف کرایا۔

سلیم خان کی صحت سے متعلق مزید تفصیلات کا انتظار کیا جا رہا ہے۔