عید پر بسیارخوری، لاہور میں گیسٹرو اور ڈائریا کےسیکڑوں مریض رپورٹ

ویب ڈیسک: لاہوریے بسیار خوری سے باز نہ آئے، عید الاضحیٰ کے پہلے دن گیسٹرو، ڈائریا کے سیکڑوں مریض رپورٹ ہوئے۔

 تفصیلات کے مطابق لاہور کے ہسپتالوں کی ایمرجنسی میں معدہ کے انفیکشن، ڈائریا کے مریضوں کی تعداد بڑھ گئی، پہلے روز شہر کے 6 بڑے سرکاری ہسپتالوں میں دو ہزار سو سے زائد مریض رپورٹ ہوئے۔

میو ہسپتال میں 180 سے زائد مریض گیسٹرو، ڈائریا اور پیٹ درد کے ساتھ آئے، جناح ہسپتال میں 130 سے زائد جبکہ جنرل اور سروسز ہسپتال میں سو سے زائد مریض سامنے آئے، گنگارام اور میاں منشی ہسپتال میں بھی مریض رپورٹ ہوئے۔

شہر کے میڈیکل سٹورز پر بھی سیکڑوں مریضوں نے سیلف میڈیکیشن لی۔

طبی ماہرین کا کہنا ہے کہ عیدالاضحیٰ پر بسیار خوری سے معدے کی بیماریاں پیدا ہوتی ہیں، معدے و جگر کے مریض گوشت کھانے سے زیادہ متاثر ہوتے ہیں، انہوں نے مشورہ دیا کہ عید کا گوشت سبزیوں کے ساتھ کھائیں، بیمار افراد سو گرام سے زیادہ گوشت نہ کھائے، دہی، لیموں اور پانی کا زیادہ استعمال کریں۔