چھاتی کے سرطان سے آگاہی کا عالمی دن: بروقت تشخیص اور علاج یقینی بنانے پر صدر اور وزیراعظم کا زور

ویب ڈیسک: وزیراعظم شہباز شریف، صدرِ مملکت آصف علی زرداری اور خاتونِ اول آصفہ بھٹو زرداری نے چھاتی کے سرطان سے آگاہی کے عالمی دن پر خواتین کو اپنی صحت پر توجہ دینے، بروقت طبی مشورہ لینے اور مرض کی جلد تشخیص یقینی بنانے پر زور دیا ہے۔

وزیراعظم شہباز شریف نے اپنے پیغام میں کہا کہ حکومت کی کوشش ہے کہ کوئی بھی پاکستانی خاتون علاقے یا مالی مشکلات کے باعث معیاری علاج سے محروم نہ رہے۔ انہوں نے کہا کہ بنیادی صحت کی سہولیات اور سرطان کے خصوصی علاج تک رسائی بہتر بنانے کے لیے اقدامات کیے جا رہے ہیں، بالخصوص دیہی اور پسماندہ علاقوں میں خواتین کو سہولیات فراہم کرنے پر توجہ دی جا رہی ہے۔

وزیراعظم کے مطابق لیڈی ہیلتھ ورکرز چھاتی کے سرطان کی علامات، خود معائنے اور بروقت طبی رہنمائی سے متعلق آگاہی پھیلانے میں اہم کردار ادا کر رہی ہیں۔ پمز میں قائم وفاقی مرکز بھی اسکریننگ، تشخیص، مفت ادویات اور مریضوں کو مزید علاج کے لیے متعلقہ مراکز تک پہنچانے کی سہولت فراہم کر رہا ہے۔

شہباز شریف نے خاندانوں، ذرائع ابلاغ، مذہبی رہنماؤں، تعلیمی اداروں اور طبی ماہرین پر زور دیا کہ وہ مرض سے متعلق خاموشی اور جھجک ختم کرنے اور خواتین کو بروقت معائنے اور علاج کی ترغیب دینے میں اپنا کردار ادا کریں۔

صدرِ مملکت آصف علی زرداری نے کہا کہ چھاتی کا سرطان ہزاروں پاکستانی خاندانوں کو متاثر کرتا ہے، اس لیے خواتین کو اپنی صحت میں ہونے والی تبدیلیوں پر توجہ دینی چاہیے اور ضرورت پڑنے پر طبی مشورہ حاصل کرنا چاہیے۔ انہوں نے متاثرہ خواتین کو جذباتی، سماجی اور خاندانی معاونت فراہم کرنے کی اہمیت بھی اجاگر کی۔

خاتونِ اول آصفہ بھٹو زرداری نے خواتین پر زور دیا کہ وہ اپنی صحت کو ترجیح دیں اور کسی بھی تشویش کی صورت میں مستند طبی ماہرین سے رجوع کرنے میں ہچکچاہٹ محسوس نہ کریں۔ انہوں نے ڈاکٹروں، طبی عملے، رضاکاروں اور ذرائع ابلاغ کی کوششوں کو سراہتے ہوئے کہا کہ درست معلومات کی فراہمی اور مرض پر کھل کر بات کرنا ضروری ہے تاکہ متاثرہ خواتین خود کو تنہا محسوس نہ کریں۔