ٹرمپ کی الہان عمر پر تنقید، کانگریس سے نکالنے کا مطالبہ بھی کر دیا

ویب ڈیسک: امریکی صدر ڈونلڈ ٹرمپ نے ایک بار پھر ڈیموکریٹک نمائندے الہان عمر کو تنقید کا نشانہ بناتے ہوئے ان کے مواخذے اور کانگریس سے اخراج کا مطالبہ کیا ہے۔

ٹرمپ نے ایئر فورس ون میں سوار نامہ نگاروں کو بتایا کہ میرے خیال میں الہان عمر کا مواخذہ کیا جانا چاہیے، میرے خیال میں وہ خوفناک ہے، اگر اس کی مذمت کی جاتی ہے تو یہ بہت اچھا ہے۔ اسے ہٹا دیا جائے تو اور بھی بہتر ہو گا۔

امریکی صدر نے کہا کہ انہوں نے بغیر کسی وجہ کے دو بار میرا مواخذہ کیا… اس کا مواخذہ کیا جانا چاہئے اور اسے جلد ہونا چاہئے۔ صدر ٹرمپ نے الہان عمر کی صومالی نژاد شناخت پر بھی تنقید کی تھی۔ ان کا کہنا تھا کہ یہ لوگ کچھ نہ رکھنے والے ملک سے آتے ہیں اور ہمیں چلانا سکھاتے ہیں۔

ٹرمپ نے سوشل میڈیا پر صومالیہ کو کرپٹ اور غیر مستحکم ملک قرار دیا۔ ایوان نمائندگان نے ایک روز قبل الہان عمر کے خلاف قرارداد کو مسترد کر دیا تھا۔