ویب ڈیسک: تھائی لینڈ اور کمبوڈیا کے درمیان کشیدگی اُس وقت شدید ہوگئی جب دونوں ممالک کی افواج نے متنازع اور سخت نگرانی والے سرحدی علاقوں میں ایک دوسرے پر حملے شروع کر دیے۔
یہ جھڑپیں اُس واقعے کے بعد شروع ہوئیں جب ایک روز قبل تھائی فوجی بارودی سرنگ کے دھماکے میں زخمی ہوا، جس کے نتیجے میں تھائی حکومت نے ایک کمبوڈین سفارت کار کو ملک بدر کر دیا۔
ابتدائی اطلاعات کے مطابق، کمبوڈین افواج نے تھائی لینڈ کے صوبہ سیساکیت کے ضلع کانتارالک کے علاقے بان پھو میں واقع پی ٹی ٹی گیس اسٹیشن اور 7-الیون اسٹور کو BM-21 گریڈ راکٹوں سے نشانہ بنایا، جس سے متعدد شہری اور طلبہ جاں بحق یا زخمی ہو گئے۔
آج صبح 10 بج کر 42 منٹ پر کمبوڈین فوج نے تھائی صوبے سورن کے ضلع کپ چوئنگ میں شہری گھروں پر مزید راکٹ حملے کیے، جس کے نتیجے میں مزید جانی نقصان کی اطلاعات موصول ہوئیں۔
ایک اور واقعے میں کمبوڈین راکٹ فائرنگ کا نشانہ سورن میں واقع پھانوم ڈونگ راک اسپتال بنا، جس سے کشیدگی مزید شدت اختیار کر گئی۔
میدانِ جنگ میں بڑھتی ہوئی صورتِ حال پر ردعمل دیتے ہوئے، تھائی رائل ایئر فورس کے F-16 جنگی طیاروں نے صبح 11:30 بجے کمبوڈیا کے علاقے چونگ آرن ما میں واقع ایک فوجی اڈے کو نشانہ بنایا۔
سرحدی علاقوں میں صورتحال بدستور غیر یقینی ہے، جب کہ عام شہریوں کی سلامتی کے حوالے سے شدید خدشات پیدا ہو چکے ہیں۔