ویب ڈیسک : ویلکم ٹو امریکا ۔۔ صدر ڈونلڈ ٹرمپ نے اشرافیہ کو امریکی شہریت دینے کے لئے’’ ٹرمپ گولڈ کارڈ’’ متعارف کرادیا۔ یہ " گرین کارڈ کا پریمیم ورژن" ہوگا۔
امریکی صدر ڈونلڈ ٹرمپ نے امریکا میں مستقل رہائشی اجازت نامے کے لیے پانچ ملین ڈالر میں ایک نئے " گولڈ کارڈ" کو فروخت کرنے کا منصوبہ متعارف کرادیا ، جس کے تحت دولت مند افراد امریکا میں مستقل رہائش کے ساتھ ساتھ شہریت بھی حاصل کر سکیں گے۔ یہ نیا منصوبہ سرمایہ کاروں کے لیے 35 برس پرانے ویزا سسٹم کی جگہ لے گا۔
ٹرمپ نے اوول آفس میں نامہ نگاروں کے ساتھ بات چیت میں کہا، "ہم ایک گولڈ کارڈ فروخت کرنے جا رہے ہیں۔ آپ کے پاس گرین کارڈ ہے، یہ ایک گولڈ کارڈ ہے۔ ہم اس کارڈ کی قیمت تقریباً پانچ ملین ڈالر مقرر کرنے جا رہے ہیں۔"
اس سے کون فائدہ اٹھا سکتا ہے؟ اس بارے میں بات کرتے ہوئے ٹرمپ نے کہا، "وہ دولت مند اور کامیاب افراد ہوں گے، وہ بہت زیادہ پیسہ خرچ کرنے والے ہوں گے، بہت سارا ٹیکس ادا کر رہے ہوں گے اور بہت سے لوگوں کو ملازمت دیں گے اور ہمیں لگتا ہے کہ یہ انتہائی کامیاب ہونے والا ہے۔"
ٹرمپ گولڈ کارڈ ای بی 5 ویزا پروگرام کا متبادل؟
صدر ٹرمپ کے اس اعلان کے بعد امریکا کے کامرس سیکریٹری ہاورڈ لوٹینک نے اس کی وضاحت کرتے ہوئے کہا کہ یہ ایک نیا اجازت نامہ ہے، جسے ' ٹرمپ گولڈ کارڈ' کا نام دیا گیا ہے اور یہ آئندہ دو ہفتوں کے اندر ای بی 5 ویزا پروگرام کی جگہ لے گا۔
ای بی 5 ویزا پروگرام کیا ہے؟
واضح رہے کہ امریکی ایوان نمائندگان نے سن 1990 میں ای بی- 5 ویزا متعارف کروایا تھا، جس کا مقصد غیر ملکی سرمایہ کاری کے مواقع پیدا کرنا تھا۔ اس کے تحت ان لوگوں کو امریکا کی مستقل رہائش کی اجازت دی جاتی ہے، جو کم از کم 10 افراد کو ملازمت دینے والی امریکی کمپنی میں کم سے کم ایک ملین ڈالر خرچ کرنے کا وعدہ کریں۔
کامرس سیکریٹری ہاورڈ لوٹینک نے کہا کہ گولڈ کارڈ بالآخر گرین کارڈ یا مستقل رہائشی کارڈ ہو گا، جس کے تحت امریکا میں سرمایہ کاروں کے داخلے کی قیمت میں اضافہ کیا گیا ہے۔ انہوں نے کہا کہ اس نئے کارڈ کے ذریعے ای بی -5 ویزا پروگرام میں دھوکہ دہی اور دیگر "خرافات" کو ختم کیا جا سکے گا اور بالآخر یہ شہریت کے حصول کا باعث بنے گا۔
امیگریشن سے متعلق سرکاری اعداد و شمار کے مطابق 30 ستمبر 2022 تک، ایک سال کے اندر، تقریباﹰ آٹھ ہزار افراد نے ای بی -5 ویزا پروگرام کا استعمال کیا تھا۔
البتہ سن 2021 میں کانگریس کی ریسرچ سروس کی ایک رپورٹ میں کہا گیا تھا کہ اس پروگرام سے دھوکہ دہی کا بھی خطرہ ہے۔
دولت مند روسی بھی درخواست کے اہل
اگرچہ ٹرمپ گولڈ کارڈ کے بارے میں ابھی تک مکمل تفصیلات واضح نہیں ہیں، تاہم ٹرمپ کے خیال میں، یہ پروگرام روسیوں کو بھی دستیاب کروایا جا سکتا ہے۔
ٹرمپ نے اس حوالے سے کہا، "میں کچھ روسی اشرافیہ کو جانتا ہوں، جو بہت اچھے لوگ ہیں۔ یہ ممکن ہے کہ وہ اتنے دولت مند نہ ہوں جتنے پہلے تھے۔ لیکن میرے خیال میں وہ کر سکتے ہیں۔ میرے خیال میں وہ پانچ ملین ڈالر برداشت کر سکتے ہیں۔"
باوجود اس کے کہ شہریت کی اہلیت کانگریس کے دائرہ کار میں آتی ہے، ٹرمپ نے یہ بھی کہا کہ گولڈ کارڈ کو کانگریس کی منظوری کی ضرورت نہیں ہو گی۔