ویب ڈیسک: گوگل نے اپنے معروف ویب براؤزر کروم میں ایک نیا سیکیورٹی فیچر متعارف کرانے کا اعلان کیا ہے، جو صارفین کو ہیک شدہ یا لیک ہونے والے پاس ورڈز سے بچانے کے لیے خودکار اقدامات کرے گا۔
گوگل کے مطابق، یہ فیچر اس وقت متحرک ہوگا جب صارف کا پاس ورڈ کسی ڈیٹا بریچ میں افشا ہو جائے گا، اور براؤزر خودکار طور پر نیا، مضبوط پاس ورڈ تجویز کرکے، صارف کی اجازت سے، اسے پرانے کی جگہ اپ ڈیٹ کر دے گا۔
یہ اعلان گوگل کی حالیہ سالانہ ڈویلپر کانفرنس کے دوران کیا گیا، جب کمپنی نے بتایا کہ نئی سہولت کو پہلے مرحلے میں ڈویلپرز کے لیے پیش کیا جا رہا ہے تاکہ وہ اپنی ویب سائٹس اور ایپس کو اس تبدیلی کے لیے تیار کر سکیں۔
گوگل کی جانب سے جاری کردہ ایک بلاگ پوسٹ میں کہا گیا کہ"ہم جانتے ہیں کہ اکثر صارفین کو علم نہیں ہوتا کہ ان کا پاس ورڈ لیک ہو چکا ہے، اور اگر پتہ بھی چل جائے تو وہ اسے تبدیل کرنے میں تاخیر کرتے ہیں۔"
اسی تناظر میں، گوگل کروم کا یہ نیا فیچر صارف کو نہ صرف کمزور یا ہیک شدہ پاس ورڈز کے بارے میں خبردار کرے گا بلکہ ان کے متبادل بھی فراہم کرے گا — وہ بھی خودکار طریقے سے۔
اگرچہ اس نوعیت کے فیچرز پہلے مختلف پاس ورڈ منیجرز میں دستیاب تھے، تاہم پہلی بار گوگل نے یہ سہولت براہ راست کروم براؤزر کا حصہ بنا دی ہے، جس سے صارفین کو کسی الگ سافٹ ویئر یا ایکسٹینشن کی ضرورت نہیں پڑے گی۔
گوگل کا کہنا ہے کہ"ہم صارفین کی اجازت کے بغیر کسی بھی پاس ورڈ کو خود سے تبدیل نہیں کریں گے۔"تاہم کمپنی نے یہ وضاحت نہیں کی کہ صارف کی اجازت لینے کا طریقہ کار کیا ہوگا۔
گوگل کے مطابق یہ فیچر فی الحال اعلان کے مرحلے میں ہے اور اس کا باضابطہ اجرا رواں سال متوقع ہے۔