ویب ڈیسک: کینیڈا کے شہر بریمپٹن میں بھارتی نوجوان کو حراست میں لے لیا گیا، واقعہ کی اطلاع ملنے پر پیل ریجنل پولیس نے 20 سالہ ملزم جگدیپ سنگھ کو گرفتار کیا، اس پر الزام ہے کہ اس نے ٹرانزٹ بس سے اترنے والے ایک شخص کو بندوق دکھا کر دھمکی دی۔
پولیس کے مطابق یہ واقعہ 27 دسمبر 2025 کی رات تقریباً ایک بجے چنگواکوسی روڈ اور ڈرنک واٹر روڈ کے علاقے میں پیش آیا۔ متاثرہ شخص جیسے ہی ٹرانزٹ بس سے اترا تو ملزم اس کے پیچھے چل پڑا اور قریب جا کر اسے بتایا کہ اس کے پاس بندوق ہے۔ خوفزدہ شہری نے فوری طور پر پولیس کو اطلاع دی۔
اطلاع ملنے پر پولیس نے فوری کارروائی کرتے ہوئے مشتبہ شخص کو حراست میں لے لیا۔ گرفتاری کے دوران ملزم نے ایک بندوق برف کے ایک ڈھیر میں پھینک دی جسے پولیس نے برآمد کر لیا۔
پولیس کے مطابق ملزم کے بیگ کی تلاشی کے دوران رسیوں کے بنڈل، ٹیپ کے رول، دستانے اور دو چھریاں بھی برآمد ہوئیں جس سے واقعے کی سنگینی مزید بڑھ گئی ہے۔ گرفتار نوجوان کی شناخت جگدیپ سنگھ کے نام سے ہوئی ہے جو بریمپٹن کا رہائشی ہے۔
جگدیپ سنگھ پر خطرناک مقصد کے لیے ہتھیار رکھنے اور قابلِ گرفت سنگین جرم کی سازش کے الزامات عائد کیے گئے ہیں۔ پولیس کا کہنا ہے کہ یہ الزامات تاحال عدالت میں ثابت نہیں ہوئے اور ملزم کو بیل کی سماعت تک حراست میں رکھا گیا ہے۔
پیل ریجنل پولیس کے مطابق یہ گرفتاری ایک ممکنہ سنگین جرم کی سازش کی تحقیقات کا حصہ ہے جس نے عوامی ٹرانزٹ سسٹم میں سکیورٹی سے متعلق خدشات کو اجاگر کیا ہے۔ خوش قسمتی سے اس واقعے میں متاثرہ شخص کو کوئی جسمانی نقصان نہیں پہنچا۔