(ویب ڈیسک ) ٹک ٹاک نے صارفین کے لیے ایک اور زبردست سہولت متعارف کرائی ہے، جس کے تحت اب ایپ پر صرف ویڈیوز دیکھنے یا شیئر کرنے تک محدود رہنے کے بجائے، صارفین ایک دوسرے کو وائس نوٹس، تصاویر اور ویڈیوز بھی بھیج سکیں گے۔
ٹیکنالوجی ویب سائٹ کے مطابق ٹک ٹاک کے اس نئے فیچر کی بدولت صارفین اب 60 سیکنڈز تک کی وائس ریکارڈنگ براہِ راست پیغام میں شیئر کر سکتے ہیں۔ ساتھ ہی ایک وقت میں 9 تصاویر یا ویڈیوز بھی بھیجی جا سکتی ہیں، چاہے وہ موبائل کی گیلری سے ہوں یا کیمرے سے لی گئی ہوں۔
کمپنی کے مطابق اس تبدیلی کا مقصد ٹک ٹاک کو ایک مکمل رابطے کے پلیٹ فارم میں تبدیل کرنا ہے، جسے صارفین روزمرہ بات چیت کے لیے بھی استعمال کر سکیں — بالکل ویسے ہی جیسے واٹس ایپ یا انسٹاگرام استعمال ہوتے ہیں۔
صارفین کی پرائیویسی کے تحفظ کے لیے ٹک ٹاک نے ایک حفاظتی فیچر بھی شامل کیا ہے: اگر کوئی نیا شخص آپ کو پہلا پیغام بھیج رہا ہے تو وہ اپنی لی گئی تصاویر یا ویڈیوز نہیں بھیج سکے گا، بلکہ صرف ایپ پر موجود مواد شیئر کر سکے گا۔
ٹک ٹاک کی یہ نئی سہولت مرحلہ وار اگلے چند ہفتوں میں تمام صارفین کو دستیاب ہو جائے گی۔