نگراں وزیرِ اطلاعات پنجاب عامر میر نے آٹے کی تقسیم کے دوران 20 افراد کی ہلاکت کا دعویٰ مضحکہ خیز قرار دے کر اس کی تردید کر دی ہے ۔ ایک بیان میں عامر میر کا کہنا تھا کہ آٹا تقسیم کے دوران صرف 3 لوگ جاں بحق ہوئے ہیں ۔ان کا کہنا تھا کہ پاکستان تحریک انصاف کے مرکزی رہنما و سابق وفاقی وزیر فواد چوہدری کی جھوٹ کی دکان اب نہیں چل پائے گی ، رمضان میں ہی جھوٹ بولنے سے پرہیز کر لیں ۔ عامر میر نے کہا کہ پاکستانی عوام جھوٹ اور سچ کا فرق اچھی طرح جان چکے ہیں ۔ دوسری جانب پنجاب کی نگراں حکومت کے ترجمان کے مطابق اب تک 36 اضلاع میں 2 کروڑ 11 لاکھ 25 ہزار سے زائد آٹے کے تھیلے مستحق افراد میں تقسیم کیے جاچکے ہیں ۔ ترجمان نے بتایا کہ نادرا اور بے نظیر انکم سپورٹ پروگرام میں رجسٹرڈ اہل افراد کے اعداد و شمار کے مطابق اب تک 1 کروڑ 9 لاکھ 37 ہزار 331 گھرانے مفت آٹا اسکیم سے مستفید ہوچکے ہیں ۔ انہوں نے مزید کہا کہ آٹا پوائنٹس پر نظم و ضبط قائم رکھنے اور مستحق افراد کی رہنمائی کیلئے انتظامیہ پولیس اور دیگر تمام متعلقہ ادارے متحرک ہیں ۔