ویب ڈیسک: تھانہ چاپری میانوالی پر خوارجی دہشت گردوں کا اچانک حملہ،پنجاب پولیس میانوالی نے دہشتگردوں کا حملہ ناکام بنادیا، 4 دہشت گرد ہلاک ہوگئے۔
ترجمان پنجاب پولیس کے مطابق کے پی کے سے متصل پنجاب کی بین الصوبائی سرحد پر عیسی خیل سرکل کے تھانہ چاپری پر دہشت گرد حملہ آور ہوئے،20 سے زائد خوارجی دہشت گردوں نے بھاری اسلحہ کے ساتھ تھانہ پر اچانک حملہ کیا،پولیس اور خوارجی دہشت گردوں کے درمیان شدید فائرنگ کا تبادلہ ہوا، دہشت گردوں نے تھانہ کی عمارت پر راکٹ لانچرز برسائے، ہینڈ گرنیڈز بھی پھینکے۔
ترجمان پنجاب پولیس کا کہناتھا کہ تھانہ چاپری کا تمام عملہ محفوظ رہا، 02 پولیس اہلکار معمولی زخمی ہوئے،پولیس کی جوابی فائرنگ سے 4 خارجی دہشت گرد ہلاک ہو گئے، ڈی پی او میانوالی اختر فاروق، سینئر پولیس افسران موقع پر موجود تھے، آئی جی پنجاب ڈاکٹر عثمان انور نے دہشت گردوں کا حملہ ناکام بنانے پر میانوالی پولیس کو شاباش دی۔
آئی جی پنجاب کا کہناتھا کہ پنجاب پولیس ہمہ وقت الرٹ ہے، دہشت گردوں کے ناپاک عزائم کو خاک میں ملا کر دم لیں گے،پنجاب پولیس امن دشمن عناصر کا اسی طرح جواں مردی سے مقابلہ کرتی رہے گی۔
وفاقی وزیرداخلہ محسن نقوی نےمیانوالی کے کے تھانہ چاپری پر دہشتگردوں کا حملہ ناکام بنانے پر پولیس کو خراج تحسین پیش کیا، وزیرداخلہ محسن نقوی نے حملہ پسپا کرنے پر میانوالی پولیس افسران اور جوانوں کو شاباش دی۔
اپنے بیان میں ان کا کہناتھا کہ پولیس نے بہادری کے ساتھ دہشتگردوں کے مذموم عزائم کو ناکام بنایا اور 2 دہشتگردوں کو جہنم واصل کیا، دہشتگردوں کے ناپاک ارادے ناکام بنانے پر میانوالی پولیس کی جرات اور دلیری کو سراہتے ہیں، پنجاب پولیس کے کمانڈر آئی جی عثمان انور اور ان پوری ٹیم کو بھی مبارکباد دیتا ہوں۔
میانوالی پولیس نے پہلے بھی ہمیشہ جرات اور بہادری سے دہشتگردوں کے مذموم عزائم کو خاک میں ملایا ہے،وزیرداخلہ محسن نقوی نےپولیس کے 2 زخمی جوانوں کی جلد صحتیابی کیلئے دعا کی۔