ویب ڈیسک: انٹرنیشنل کرکٹ کونسل (آئی سی سی) نے امریکا کی ویمنز کرکٹ ٹیم کی آل راؤنڈر اِسانی واگھیلا پر غیر قانونی بولنگ ایکشن کے باعث بولنگ کرانے پر پابندی عائد کر دی ہے۔
آئی سی سی کے مطابق پابندی کے بعد اِسانی واگھیلا بین الاقوامی کرکٹ میں اس وقت تک بولنگ نہیں کرا سکیں گی جب تک وہ اپنا بولنگ ایکشن درست کر کے باضابطہ ٹیسٹ میں کامیاب نہیں ہو جاتیں۔
آئی سی سی کی جانب سے جاری بیان میں بتایا گیا ہے کہ ویمنز ٹی ٹوئنٹی ورلڈ کپ کوالیفائر میں آئرلینڈ کے خلاف میچ کے دوران میچ آفیشلز نے ان کے بولنگ ایکشن پر اعتراض اٹھایا تھا، جس کے بعد معاملہ آئی سی سی ایونٹ پینل کو بھیجا گیا۔
ایونٹ پینل نے آئرلینڈ کے خلاف میچ کے بعد پاپوا نیو گنی کے خلاف کھیلے گئے اگلے میچ میں اِسانی واگھیلا کے بولنگ ایکشن کا تفصیلی جائزہ لیا۔ تجزیے کے بعد یہ نتیجہ اخذ کیا گیا کہ ان کا ایکشن آئی سی سی قوانین کے مطابق درست نہیں ہے، جس پر فوری طور پر پابندی عائد کر دی گئی۔
آئی سی سی کا کہنا ہے کہ یہ پابندی اس وقت تک برقرار رہے گی جب تک اِسانی واگھیلا اپنا بولنگ ایکشن درست کر کے دوبارہ آزمائشی ٹیسٹ پاس نہیں کر لیتیں۔ کامیاب ٹیسٹ کے بعد ہی انہیں بین الاقوامی سطح پر بولنگ کی اجازت دی جائے گی۔
واضح رہے کہ 20 سالہ میڈیم پیسر اِسانی واگھیلا نے ٹی ٹوئنٹی انٹرنیشنل کرکٹ میں 2021 میں ڈیبیو کیا تھا، جبکہ ایک روزہ کرکٹ میں انہوں نے 2024 میں قدم رکھا۔ کم عمری کے باوجود وہ امریکا کی ویمنز ٹیم کی نمایاں آل راؤنڈر سمجھی جاتی ہیں۔
کرکٹ ماہرین کے مطابق غیر قانونی بولنگ ایکشن کے خلاف آئی سی سی کے اقدامات کھیل میں شفافیت اور منصفانہ مقابلے کو یقینی بنانے کے لیے اہم ہیں، جبکہ نوجوان کھلاڑیوں کو ایکشن درست کرنے کا موقع دینا ایک مثبت پیش رفت ہے۔