پنجاب میں بزرگان دین کے مزارات کی تزئین و آرائش اور توسیع کا فیصلہ

پنجاب میں بزرگان دین کے مزارات کی تزئین و آرائش اور توسیع کا فیصلہ
لاہور: نگران وزیراعلیٰ محسن نقوی نے مرحلہ وار پروگرام کے تحت بزرگان دین کے مزارات کی تزئین و آرائش اور توسیع کے پروگرام کی منظوری دیدی ۔ پنجاب میں بزرگان دین کے مزارات کی تزئین و آرائش اور توسیع کا فیصلہ کیا گیا ہے، نگران وزیراعلیٰ محسن نقوی نے مرحلہ وار پروگرام کے تحت مزارات کی تزئین و آرائش اور توسیع کے پروگرام کی منظوری دے دی۔ پہلے مرحلے میں ملتان میں حضرت شاہ شمس تبریزؒ، قصور میں حضرت بابا بلھے شاہؒ، پاکپتن میں بابا فریدالدین مسعود گنج شکرؒ اور لاہو رمیں حضرت سید عزیزالدین پیر مکیؒ کے مزارات کی تزئین و آرائش اور توسیع ہوگی۔ تمام مزارات کو مرحلہ وار پروگرام کے تحت اپ گریڈ کیا جائے گا اور زائرین کیلئے زیادہ سے زیادہ سہولتیں فراہم کی جائیں گی۔ نگران وزیراعلیٰ محسن نقوی نے لنگرخانوں کے ساتھ لائبریری، سرائے، واش رومز سمیت دیگر ضروریات کو بہتر بنانے کی ہدایت کرتے ہوئے کہا کہ مزارات کی تزئین و آرائش اور توسیع سے متعلقہ امور فوری طے کئے جائیں اور جتنی جلد ممکن ہوسکے، مزارات کی تزئین و آرائش اور توسیع کے پروگرام پر کام کا آغاز کیا جائے اور داتا دربار کی توسیع کے کام کو جلد شروع کیا جائے۔ نگران وزیر اعلی محسن نقوی نے بی بی پاکدامن کے مزار کی توسیع کے کام کو محرم الحرام سے قبل مکمل کرنے کی بھی ہدایت کی۔ نگران وزیراعلیٰ پنجاب محسن نقوی کی زیر صدارت آج وزیراعلیٰ آفس میں اجلاس منعقد ہوا جس میں مزارات کی تزئین و آرائش اور توسیع کے پروگرام کا جائزہ لیا گیا۔ صوبائی وزیر اوقاف اظفر علی ناصر، سیکرٹری اوقاف، سیکرٹری تعمیرات و مواصلات، معروف آرکیٹیکٹ نیئر علی دادا اور سیکرٹری کوآرڈینیشن وزیراعلیٰ نے اجلاس میں شرکت کی۔
ایڈیٹر

احمد علی کیف نے یونیورسٹی آف لاہور سے ایم فل کی ڈگری حاصل کر رکھی ہے۔ پبلک نیوز کا حصہ بننے سے قبل 24 نیوز اور سٹی 42 کا بطور ویب کانٹینٹ ٹیم لیڈ حصہ رہ چکے ہیں۔