ویب ڈیسک: بانی پی ٹی آئی عمران خان کی ہمشیرہ علیمہ خان نےکہا ہے کہ آج بانی پی ٹی آئی عمران خان اور بشریٰ بی بی سے ایک ہفتے بعد ملاقات ہوئی، عمران خان بلکل صحت مند اور خوش لگ رہے تھے۔ عمران خان کے کان میں کوئی تکلیف نہیں نہ کوئی اور بیماری ہے،اللہ تعالٰی عمران خان کی حفاظت کررہا ہے،مزید کہا کہ القادر کیس کا فیصلہ بھی زیادہ سے زیادہ ایک ہفتے میں ہوسکتا ہے،کوئی ڈوگر ہے جسکو خاص بلایا گیا ہے تاکہ القادر کی اپیل نہ لگے،یہ سب کچھ بانی کو دباؤ میں لانے کیلئے کیا جارہا ہے، عمران خان نے کہا ہے جو مرضی کرلیں ڈیل نہیں کرونگا۔
تفصیلات کے مطابق بانی پی ٹی آئی عمران خان کی ہمشیرہ علیمہ خان نے میڈیا سے گفتگو کرتے ہوئے کہا کہ آج بانی پی ٹی آئی عمران خان سے ایک ہفتے بعد ملاقات ہوئی ہے، عمران خان کے تمام کیسز کی سماعت ملتوی ہوئی ہے،آج ہماری بشریٰ بی بی اور عمران خان سے ملاقات ہوئی ہے، عمران خان بلکل صحت مند اور خوش لگ رہے تھے۔ عمران خان کے کان میں کوئی تکلیف نہیں نہ کوئی اور بیماری ہے۔
علیمہ خان نے کہا کہ اسٹیبلشمنٹ کے ٹاؤٹ سوشل میڈیا پر بیٹھ کر افواہیں پھیلاتے ہیں،ان ٹاؤٹوں سے کوئی پوچھے انکے سورسز کیا ہیں،سوشل میڈیا پر اب رومر چل رہا ہے کہ عمران خان کے دماغ میں اب کوئی انفیکشن ہوا ہے،اللہ تعالٰی عمران خان کی حفاظت کررہا ہے، بانی پی ٹی آئی کے ذاتی معالج کو ان سے ملاقات نہیں کرارہے اور بچوں سے بھی بات نہیں کرائی جاتی۔
انہوں نے کہا کہ سلمان اکرم راجہ کو آج یہ ذمہ داری دی گئی ہے وہ عمران خان کی ذاتی پٹیشنز کو دیکھیں گے، القادر کیس کا فیصلہ بھی زیادہ سے زیادہ ایک ہفتے میں ہوسکتا ہے،کوئی ڈوگر ہے جسکو خاص بلایا گیا ہے تاکہ القادر کی اپیل نہ لگے،یہ سب کچھ بانی کو دباؤ میں لانے کیلئے کیا جارہا ہے، عمران خان نے کہا ہے جو مرضی کرلیں ڈیل نہیں کرونگا، عمران خان کو ارباب نیاز اسٹیڈیم کا نام تبدیل کرنے کی بات پسند نہیں آئی، بانی نے کہا ہے ارباب نیاز اسٹیڈیم کا نام واپس رکھا جائے۔