(ویب ڈیسک ) وزیراعظم محمد شہباز شریف نے کہا ہے کہ خصوصی اور والدین کی نعمت سے محروم بچے بے پناہ صلاحیتوں کے مالک ہیں، تمام بچے اعلیٰ تعلیم حاصل کرکے ملک کی بھرپور خدمت کریں گے، معیاری تعلیم کی فراہمی کیلئے دور دراز علاقوں میں دانش سکول قائم کئے جائیں گے، عوام کو علاج کی بہتر سہولیات کی فراہمی کیلئے اسلام آباد، بلوچستان، کشمیر اور گلگت بلتستان میں جدید ہسپتال بنائیں گے۔
وزیر اعظم نے گزشتہ روز خصوصی صلاحیتوں کے مالک اور والدین کی نعمت سے محروم بچوں کے اعزاز میں افطار ڈنر سے خطاب کرتے ہوئے کہا کہ انہیں خصوصی بچوں سے ملاقات کرکے بہت مسرت ہوئی ہے، آج کے افطار ڈنر کے مہمانان خصوصی یہ بچے اور بچیاں ہیں اور میں آپ کا میزبان ہوں۔
وزیراعظم نے کہا کہ یہ بچے انتہائی ذہین اور قابلیت والے ہیں جو ایس او ایس اور دیگر اداروں میں تعلیم حاصل کر رہے ہیں، یہاں پر خصوصی بچے اور بچیاں بھی موجود ہیں جو بہت قابل اور محنتی ہیں، ان کے عزائم بلند ہیں، ماں باپ کا سایہ سروں پر ہونے سے بڑی کوئی نعمت نہیں ہے، جن بچوں کے سر پر ان کے والدین کا سایہ نہیں ہے ایس او ایس ان کے والدین کا کردار ادا کر رہا ہے۔
انہو ں نے کہا کہ ہمارے پیارے نبیﷺ جب اس دنیا میں تشریف لائے تو ان کے والد کا سایہ سر پر نہیں تھا اور جب ان کی عمر 6 سال ہوئی تو ان کی والدہ محترمہ بھی وفات پا گئیں لیکن ہمارے پیارے نبیﷺ اﷲ تعالیٰ کے سب سے محبوب نبی ہیں جن پر وحی کے ذریعے قرآن کریم نازل ہوا۔
وزیر اعظم شہباز شریف نے کہا کہ یہ رمضان المبارک کا مہینہ ہے اور اس کی برکتیں سب پر نازل ہو رہی ہیں، آپ معصوم بچے ہیں، تعلیم حاصل کر رہے ہیں، آپ اپنی قابلیت سے ڈاکٹرز، انجینئرز، فوجی افسر بنیں گے اور اپنے ملک کی بھرپور خدمت کریں گے۔
ان کا کہنا تھا کہ مجھے آپ کی میزبانی کرکے بہت خوشی ہو رہی ہے، اگر مہمان نوازی میں کوئی کمی رہ گئی ہو تو معافی کا خواستگار ہوں، یہ وزیراعظم ہاؤس آپ کا ہاؤس ہے، آپ تعلیم حاصل کرکے ایک دن یہاں آ کر قوم کی خدمت کریں گے۔
وزیراعظم نے کہا کہ اسلام آباد میں بھی دانش سکول بنایا جائے گا، اس کے علاوہ بلوچستان کے دور دراز علاقوں، کشمیر اور گلگت میں بھی دانش سکول قائم کئے جائیں گے، جہاں پر بچوں کو تعلیم کی تمام سہولیات مفت حاصل ہوں گی، خوراک، رہائش، یونیفارم اور کتابیں مفت مہیا کی جائیں گی، خصوصی صلاحیتوں کے مالک تمام بچے مختلف شعبوں میں پاکستان کی بھرپور خدمت کریں گے، آپ کے اساتذہ آپ کو ایسی تعلیم دیں گے جس سے آپ عظیم پاکستانی بنیں گے اور دنیا میں اپنی قابلیت کا لوہا منوائیں گے۔
انہوں نے مزید کہا کہ اسلام آباد میں مریضوں کی علاج کی بہتر سہولیات کی فراہمی کیلئے جدید ہسپتال بنایا جائے گا، اسی طرح آزاد کشمیر اور گلگت بلتستان میں بھی جدید سہولیات کے حامل ہسپتال بنائے جائیں گے، میری دعا کہ اﷲ آپ کو خوش و خرم رکھے، اسی طرح کی ملاقاتیں آئندہ بھی ہوتی رہیں گی۔