(ویب ڈیسک ) اسلام آباد کی بلیو ایریا مارکیٹ میں کام کرنے والے دو شہریوں نے پچھلے چھ ماہ سے نمازیوں کے جوتے چُرانے والے والے ملزم کو گھات لگا کر پکڑ لیا جس کو بعدازاں پولیس کے حوالے کر دیا گیا۔
اسلام آباد پولیس کے حکام کا کہنا ہے کہ ’ملزم کے خلاف دفعہ 411 کے تحت مقدمہ درج کیا گیا ہے اور مزید قانونی کارروائی بھی عمل میں لائی جا رہی ہے۔‘
جوتی چوری کی بڑھتی وارداروں کے بعد دو نوجوانوں جو خود بھی واردات کا شکار ہوئے تھے، ملزم کو پکڑنے کی منصوبہ بندی کی۔
انہوں نے 3 اگست کو یہ فیصلہ کیا کہ آنے جانے والوں پر نظر رکھی جائے۔
تھوڑی دیر بعد ایک نوجوان مسجد کی طرف آیا اور جب جماعت کھڑی ہو گئی تو شاپر نکال کر جوتے اس میں ڈالنا شروع کر دیے، جس پر ان دونوں نے ملزم کو پکڑ لیا جس پر دیگر لوگ بھی جمع ہو گئے اور بعدازاں ملزم کو تھانہ کوہسار لے جایا گیا۔
ملزم کو پکڑنے والے ایک نوجوان نے بتایا کہ پچھلے چھ ماہ کے دوران کئی نمازیوں کے جوتے چوری ہوئے اور ملزم نمازِ جمعہ اور دیگر اجتماعات کے موقع پر جوتے چراتا تھا۔‘
پولیس حکام نے ملزم سے تحقیقات کے بعد بتایا کہ ’ملزم اچھی اور مہنگی نظر آنے والے جوتے چُرا کر اُنہیں فروخت کرتا تھا۔ ملزم بلیو ایریا سمیت دیگر سیکٹرز کی مساجد سے بھی جوتے چٗرانے میں ملوث ہے۔‘