ویب ڈیسک: بھارتی کرکٹ بورڈ نے ٹی ٹوئنٹی ٹیم کی قیادت میں اہم تبدیلی کرتے ہوئے شریاس ائیر کو قومی ٹیم کا نیا کپتان مقرر کر دیا ہے۔ اس فیصلے کے تحت سوریا کمار یادیو کو کپتانی سے ہٹا دیا گیا ہے۔
بھارتی کرکٹ بورڈ کی جانب سے دورۂ آئرلینڈ اور انگلینڈ کے لیے ٹی ٹوئنٹی اسکواڈز کا بھی اعلان کر دیا گیا ہے، جن میں شریاس ائیر پہلی بار مستقل کپتان کی حیثیت سے ٹیم کی قیادت کرتے نظر آئیں گے۔
بورڈ حکام کے مطابق قیادت میں یہ تبدیلی مستقبل کے منصوبوں اور آئندہ بین الاقوامی ایونٹس کو مدنظر رکھتے ہوئے کی گئی ہے، جبکہ ٹیم انتظامیہ کو امید ہے کہ شریاس ائیر کی قیادت میں بھارتی ٹیم مزید مضبوط کارکردگی کا مظاہرہ کرے گی۔
دوسری جانب ایشین گیمز کے لیے بھی بھارتی اسکواڈ کا اعلان کر دیا گیا ہے، جہاں شریاس ائیر کو کپتانی کی ذمہ داریاں سونپی گئی ہیں۔ وہ نہ صرف بین الاقوامی سیریز بلکہ ایشین گیمز میں بھی بھارتی ٹیم کی قیادت کریں گے۔
کرکٹ ماہرین کا کہنا ہے کہ شریاس ائیر کو قیادت سونپنا بھارتی کرکٹ کے مستقبل کے حوالے سے ایک اہم فیصلہ ہے، جس کے اثرات آنے والے بڑے ٹورنامنٹس میں بھی دیکھنے کو مل سکتے ہیں۔