ویب ڈیسک: امریکا نے بعض غیر قانونی تارکین وطن کو انتہائی خطرناک قراردیتے ہوئے ان کے آبائی ملک بھیجنے سے قبل انہیں گوانتاناموبے حراستی مرکز میں منتقل کر دیا ہے۔ حکام نےغیر قانونی طور پر امریکا میں رہنے والے ان افراد کو انکی جرائم پیشہ سرگرمیوں کے حوالے سے "بد ترین " قرار دیا ہے۔
پینٹاگون نے اس بات کی تصدیق کی کہ 10 'انتہائی خطرناک غیر قانونی غیر ملکی' افراد کو منگل کے روز حراستی مرکز پہنچایا گیا. ان افراد کو امریکی "امیگریشن اینڈ کسٹمز انفورسمنٹ" یا ICE کےعہدہ داروں کی نگرانی میں رکھا گیا ہے۔
وائس آف امریکا نے منگل کے روز امریکی فوج کے سی 17 کارگو طیارے کے ذریعے ٹیکسس کے شہر فورٹ بلس سے گوانتانامو بے جانے والے تارکین وطن کی منتقلی اور آمد کے بارے میں سب سے پہلے اطلاع دی تھی۔
پینٹاگون کے مطابق ان انتہائی خطرناک تارکین وطن کو گوانتاناموبے حراستی مرکز میں ایک عارضی اقدام کے طور پر رکھا گیا ہے۔
ہوم لینڈ سکیورٹی کی وزیر کرسٹی نوم نے ان تارکین وطن کی فوجی کارگو طیارے میں سوار ہونے کی تیاری کے دوران کچھ تصاویر ایکس پلیٹ فارم پر پوسٹ کیں اور انہیں " بدترین سے بدتر" افراد قرار دیا۔
محکمہ برائے ہوم لینڈ سیکیورٹی نے بعد ازاں کہا کہ فوجی پرواز میں سوار تمام تارکین وطن وینزویلا کے ایک اسٹریٹ گینگ "ٹرین ڈی اراگوا" کے رکن تھے۔
یاد رہے کہ وائٹ ہاؤس نے ’ٹرین ڈی اراگوا‘ کو غیر ملکی دہشت گرد تنظیم قرار دینے کے منصوبے کا اعلان کیا ہے۔
ہوم لینڈ سکیورٹی کی وزیر کرسٹی نوئم نے ایکس پر پوسٹ کرتے ہوئے کہا کہ ان کے محکمے نے گزشتہ چند دنوں میں سزا یافتہ قاتلوں، ریپ میں ملوث افراد، بچوں سے زیادتی کرنے والوں، منشیات اسمگلروں، ایم ایس 13 گینگ کے ارکان کی گرفتاری کی نگرانی کی ہے۔