ویب ڈیسک: ابوظہبی ایئرپورٹس اور فیڈرل اتھارٹی نے منگل کے روز ایک اہم معاہدے پر دستخط کیے ہیں، جس کے تحت مسافر اب صرف سات سیکنڈ میں امیگریشن کا مرحلہ مکمل کر سکیں گے۔
ابوظہبی ایئرپورٹس حکام کے مطابق یہ شراکت داری ’’ اسمارٹ ٹریول‘‘ منصوبے کا حصہ ہے، ایک جدید نظام جس میں بایومیٹرک تصدیق اور اسمارٹ گیٹ ٹیکنالوجی استعمال کی گئی ہے۔ اس سسٹم کے ذریعے مسافروں کو طویل قطاروں میں کھڑے ہونے کی ضرورت نہیں پڑے گی، اور ان کا سفر پہلے سے کہیں زیادہ تیز اور آسان ہو جائے گا۔
معاہدے کا مقصد ہے کہ مسافر گیٹ سے لے کر کار پارک تک صرف 12 منٹ میں پہنچ جائیں، یہ اقدام ابوظہبی کو دنیا کے سب سے جدید اور تیز رفتار ایئرپورٹس میں شامل کرنے کی سمت ایک بڑا قدم ہے۔
ابوظہبی ایئرپورٹس نے حالیہ برسوں میں شاندار ترقی کی ہے، 2023 میں مسافروں کی تعداد میں 44.5 فیصد اضافہ ہوا، 2024 میں مزید 28 فیصد اضافہ ریکارڈ کیا گیا، 2025 کی پہلی ششماہی تک مسلسل 17 سہ ماہیوں میں دو ہندسوں کی شرح سے ترقی برقرار رہی۔
یہی وجہ ہے کہ نیا معاہدہ ایئرپورٹ کے نظام کو مزید مؤثر، تیز اور عالمی معیار کے مطابق بنانے میں مدد دے گا۔
یہ معاہدہ زاید انٹرنیشنل ایئرپورٹ میں دستخط کیا گیا، جہاں ایلینا سورلینی (سی ای او ابوظہبی ایئرپورٹس) اور محمد احمد عبداللہ الکویتی (ایکٹنگ ڈائریکٹر جنرل، ICP) نے اپنے اداروں کی نمائندگی میں دستخط کیے۔
اس معاہدے کے تحت دونوں ادارے بارڈر کنٹرول اور کسٹمز کے عمل کو تیز کرنا، ایمرجنسی کی تیاری اور تربیت، ڈیٹا شیئرنگ اور سروس کے معیار کو بہتر بنانا جیسےشعبوں میں ایک ساتھ کام کریں گے۔
مشترکہ ورکنگ گروپس روزانہ کے آپریشنز، ہنگامی حالات کی تیاری، اور کارکردگی کی جانچ کے لیے سرگرم رہیں گے تاکہ مسافروں کو بہترین تجربہ فراہم کیا جا سکے۔
یہ جدید ’’ اسمارٹ ٹریول‘‘ سسٹم ابوظہبی کو مستقبل کے ہوائی سفر کا عالمی نمونہ بنا دے گا، جہاں امیگریشن صرف چند سیکنڈز کا مرحلہ رہ جائے گا۔