ویب ڈیسک: عیدالاضحیٰ کے موقع پر قربانی کا گوشت محفوظ رکھنا ایک اہم مسئلہ بن جاتا ہے، خاص طور پر جب درجہ حرارت زیادہ ہو اور بجلی کی لوڈشیڈنگ عام ہو۔ ایسے میں چند آسان مگر مؤثر تدابیر اپنا کر گوشت کو طویل وقت تک محفوظ رکھا جا سکتا ہے۔
تفصیلات کے مطابق ماہرین کے مطابق گرمیوں میں گوشت کو محفوظ رکھنے کے لیے سب سے ضروری چیز صفائی اور فوری فریزر میں منتقلی ہے۔ گوشت حاصل کرتے ہی اسے ٹھنڈی اور سایہ دار جگہ پر رکھیں تاکہ بیکٹیریا کی افزائش نہ ہو۔
گوشت کو محفوظ رکھنے کے اہم نکات:
گوشت کو دھونا نہیں چاہیے: عموماً لوگ گوشت کو دھو کر فریز کرتے ہیں، لیکن ماہرین تجویز کرتے ہیں کہ گوشت کو دھونا اس کی عمر کم کر دیتا ہے۔ اگر ضروری ہو تو پکانے سے پہلے دھویا جائے۔
چھوٹے حصوں میں تقسیم کریں: قربانی کے گوشت کو چھوٹے، برابر حصوں میں کاٹ کر فریز کیا جائے۔ اس سے ضرورت کے مطابق نکالنا آسان ہوگا اور بار بار فریز کھولنے سے درجہ حرارت بھی متاثر نہیں ہوگا۔
ایئرٹائٹ پیکنگ ضروری ہے: گوشت کو پلاسٹک بیگ یا ایئرٹائٹ ڈبوں میں رکھ کر فریزر میں رکھیں تاکہ نمی اور بدبو سے محفوظ رہے۔
اگر فریزر کی گنجائش کم ہو: تو گوشت کو ابال کر محفوظ رکھنا ایک زبردست متبادل ہے۔ ابلا ہوا گوشت 3 سے 4 دن تک فرج میں بھی محفوظ رہتا ہے۔
لوڈشیڈنگ کا حل: ان علاقوں میں جہاں بجلی کی طویل بندش ہو، وہاں خشک مصالحہ لگا کر گوشت کو سکھانا (قدیم طریقہ) بھی مفید ثابت ہو سکتا ہے۔ یہ گوشت کئی دن تک خراب نہیں ہوتا۔
ماہرین کی رائے:
ماہرینِ خوراک کا کہنا ہے کہ گوشت کو صحیح درجہ حرارت پر جلد فریز کرنا اس کی تازگی اور ذائقہ برقرار رکھنے کے لیے ضروری ہے۔ اگر فوری طور پر فریز کرنا ممکن نہ ہو تو گوشت کو برف میں رکھ کر ٹھنڈا کیا جا سکتا ہے۔