(ویب ڈیسک) چیئرمین پیپلز پارٹی بلاول بھٹونے اس اہم مرحلے پر قومی اتحاد و یگانگت کی ضرورت پر زور دیتے ہوئے وزیراعظم اور حکومت کے ساتھ مکمل یکجہتی کا اظہار کیا۔
تفصیلات کے مطابق چیئرمین پاکستان پیپلز پارٹی بلاول بھٹو زرداری نے آج وزیراعظم محمد شہباز شریف کو ٹیلیفون کیا۔گفتگو کے دوران ملک کی موجودہ صورتحال پر تفصیلی تبادلۂ خیال کیا گیا۔
بلاول بھٹو زرداری نے ایران اور امریکہ کے درمیان کشیدگی کے خاتمے اور جنگ بندی کے قیام میں وزیراعظم کی فعال سفارتی کاوشوں اور مؤثر کردار کو سراہا، اور خطے میں امن کے فروغ کے لیے پاکستان کی کوششوں کی تعریف کی۔
چیئرمین پیپلز پارٹی نے اس اہم مرحلے پر قومی اتحاد و یگانگت کی ضرورت پر زور دیتے ہوئے وزیراعظم اور حکومت کے ساتھ مکمل یکجہتی کا اظہار کیا۔
وزیراعظم شہباز شریف نے بلاول بھٹو زرداری کے خیالات اور حمایت پر شکریہ ادا کرتے ہوئے اس عزم کا اعادہ کیا کہ پاکستان خطے میں امن، استحکام اور مذاکرات کے فروغ کے لیے اپنی کوششیں جاری رکھے گا۔
دونوں رہنماؤں نے اس بات پر اتفاق کیا کہ موجودہ صورتحال میں باہمی مشاورت اور قومی ہم آہنگی ناگزیر ہے تاکہ درپیش چیلنجز کا مؤثر انداز میں مقابلہ کیا جا سکے۔