(ویب ڈیسک ) موبائل فونز کو چارج کرنے کی ٹیکنالوجی دن بدن بہتر ہو رہی ہے لیکن ابھی بھی کسی موبائل کو 100 فیصد چارچ کرنے کیلئے کم از کم ایک گھنٹہ تو انتظار کرنا پڑتا ہے۔
لیکن اب بہت جلد آپ اپنے اسمارٹ فون کو محض 5 سیکنڈ کے اندر مکمل چارج کر سکیں گے۔ ایک کمپنی نے ایسی ڈیوائس تیار کی ہے جو چند سیکنڈ میں آپ کے اسمارٹ فون کو چارج کرسکتی ہے۔اس ڈیوائس کا نام سویپ اٹ ہے جسے لاس ویگاس میں کنزیومر الیکٹرونکس شو (سی ای ایس) کے موقع پر پیش کیا گیا۔
دیکھنے میں یہ ڈیوائس کسی ٹشو باکس جیسی نظر آتی ہے، جس کے کھلے منہ میں آپ کو فون انسرٹ کرنا ہوتا ہے۔ فون اندر جانے کے بعد محض 2 سیکنڈ میں ایک نئی بیٹری کے ساتھ باہر آتا ہے اور ایسا لگتا ہے کہ یہ جادو ہوا ہے۔
سویپ اٹ نامی ڈیوائس کو استعمال کرنے کیلئے صارف کو ڈیوائس کے ساتھ ایک مخصوص فون کیس کی بھی ضرورت ہوتی ہے جسے کمپنی کی جانب سے لنک کا نام دیا گیا ہے۔
اس کیس کے بیک پر ایک بیٹری ہوتی ہے جسے ڈیوائس میں انسرٹ کیا جاتا ہے اور وہی بیٹری پہلے سے مکمل چارج 3500 ایم اے ایچ بیٹری سے بدل جاتی ہے تاکہ آپ کو فون مکمل چارج ملے۔
اس حوالے سے کمپنی کا کہنا ہے کہ بیٹری بدلنے کا عمل 2 سیکنڈ میں مکمل ہو جاتا ہے اور درحقیقت اتنا برق رفتار ہے کہ اکثر صارفین کو اس کا علم ہی نہیں ہوتا۔
کمپنی نے بتایا کہ یہ ڈیوائس ہر فون کے ساتھ کام کرسکتی ہے بس آپ کے پاس سویپ اٹ کیس ہونا چاہیے۔
دیگر فون کیسز کے مقابلے میں بیٹری سے یہ لیس کچھ موٹا محسوس ہوتا ہے مگر پھر بھی زیادہ فرق نہیں ہوتا۔اس ڈیوائس کے اندر مجموعی طور پر 5 بیٹریز موجود ہیں۔
کمپنی کا کہنا ہے کہ کسی گھر کے 5 افراد برق رفتار سے نئی مکمل چارج بیٹری کو اپنے فون کا حصہ بنا سکتے ہیں۔ ایک کے بعد جب دوسرا صارف ڈیوائس کو استعمال کرتا ہے تو اسے 4 سیکنڈ تک انتظار کرنا ہوتا ہے۔
یہ ڈیوائس ایک مفت ایپ کے ساتھ بھی کام کرتی ہے جو آپ کی بیٹری کے پرسنٹیج چیک کرتی ہے اور آپ کو یہ اختیار دیتی ہے کہ بیٹری کو کتنے فیصد تک چارج کرنا ہے۔
اس ڈیوائس کی قیمت 450 ڈالرز رکھی گئی ہے جبکہ اس کے ساتھ ایک کیس 120 ڈالرز میں دستیاب ہوگا۔
کمپنی کے مطابق فی الحال آپ کو کچھ انتظار کرنا ہوگا اور آئندہ چند ماہ میں یہ ڈیوائس صارفین کو دستیاب ہوگی۔