(ویب ڈیسک)دنیا کی سب سے مقبول میسجنگ ایپلیکیشن واٹس ایپ اینڈرائیڈ پر اپنے چینلز کے بنیادی ڈھانچے میں ایک بڑی اور انقلابی تبدیلی پر کام کر رہی ہے، جس کے تحت صارفین کے فالو کردہ چینلز کو موجودہ 'اپڈیٹس' ٹیب سے ہٹا کر مرکزی ' چیٹس' (Chats) ٹیب میں منتقل کرنے کا نیا اور اسمارٹ ٹول متعارف کرایا جائے گا۔
WABetaInfo کی رپورٹ کے مطابق تمام چینلز کے لیے ایک جیسا فیصلہ مسلط کرنے کے بجائے واٹس ایپ ایک اسمارٹ الگورتھم کی مدد سے صارفین کو تجاویز پیش کرے گا۔
جن چینلز پر صارف زیادہ متحرک رہتا ہے، سسٹم انہیں خودکار طور پر مین چیٹ لسٹ میں رکھنے کی تجویز دے گا، جبکہ کم دیکھے جانے والے چینلز کو 'آرکائیو' (Archive) فولڈر میں بھیجنے کی تجویز سامنے آئے گی۔
مائیگریشن اسکرین پر ہر چینل کے سامنے ایک ڈراپ ڈاؤن مینو نظر آئے گا، جہاں صارف "Move now" دبا کر ان تجاویز کو قبول کر سکے گا یا اپنی مرضی سے کسی بھی چینل کی جگہ تبدیل کر سکے گا۔
صارفین کے پاس دستیاب 3 بڑے اختیارات:
مین چیٹ لسٹ میں رکھنا:چینل عام پیغامات کی طرح چیٹ لسٹ میں سامنے نظر آئے گا۔
آرکائیو فولڈر: چینلز آرکائیو میں چلے جائیں گے تاکہ ضرورت کے وقت دیکھے جا سکیں مگر مین اسکرین پر رش نہ بنے۔
ان فالو (Unfollow) کرنا:اسکرین پر ہی براہِ راست غیر ضروری چینلز کو مکمل طور پر ان فالو کرنے کی سہولت بھی موجود ہوگی۔
جیسے ہی چینلز اور اسٹیٹس اپڈیٹس مستقل طور پر چیٹس ٹیب کا حصہ بن جائیں گے، واٹس ایپ کی طرف سے 'اپڈیٹس' (Updates) ٹیب کو مکمل طور پر ختم کر دیا جائے گا۔
اس کی جگہ ایک نیا 'کانٹیکٹس' (Contacts) ٹیب لایا جائے گا، جس کی مدد سے صارفین باآسانی یہ دیکھ سکیں گے کہ ان کے کون سے رابطے اس وقت آن لائن ہیں اور وہ تیزی سے رابطوں کو تلاش کر سکیں گے۔
چینل مائیگریشن کا یہ اسمارٹ ٹول فی الوقت اینڈرائیڈ کے نئے بی ٹا ورژن (2.26.43.2) پر تیاری اور ٹیسٹنگ کے مراحل میں ہے۔
کمپنی نے تاحال اس کے عام صارفین کے لیے حتمی اجرا کی باضابطہ تاریخ کا اعلان نہیں کیا، تاہم جلد ہی اسے آئندہ اپڈیٹس میں شامل کیے جانے کی توقع ہے۔