ویب ڈیسک: امریکہ اور ایران کے درمیان مسلسل دو راتوں تک جاری رہنے والی کشیدگی اور باہمی حملوں کے باوجود عالمی منڈی میں خام تیل کی قیمتوں میں تقریباً 2 فیصد کمی ریکارڈ کی گئی، جس کے بعد برینٹ خام تیل کی قیمت تقریباً 76 ڈالر فی بیرل کی سطح پر آ گئی۔
اس سے قبل ہفتے کے دوران دونوں ممالک کے درمیان کشیدگی میں اضافے اور حملوں کے تبادلے کے باعث عالمی منڈی میں تیل کی قیمتوں میں نمایاں اضافہ دیکھنے میں آیا تھا۔ تنازع سے قبل خام تیل تقریباً 70 ڈالر فی بیرل کے قریب ٹریڈ کر رہا تھا۔
بدھ کو امریکی صدر ڈونلڈ ٹرمپ کے اس بیان کے بعد کہ " ایران کے ساتھ معاہدہ ختم ہو چکا ہے"، عالمی توانائی کی منڈی میں بے یقینی بڑھ گئی، جس کے نتیجے میں خام تیل کی قیمتوں میں مزید اضافہ ریکارڈ کیا گیا۔
تجزیہ کاروں کے مطابق سرمایہ کاروں کو خدشہ تھا کہ آبنائے ہرمز میں بحری جہازوں کو لاحق خطرات کے باعث مشرقِ وسطیٰ سے عالمی توانائی کی ترسیل متاثر ہو سکتی ہے، جس سے سپلائی میں رکاوٹ اور قیمتوں میں مزید اضافے کا امکان پیدا ہوا۔
کشیدگی کے دوران برینٹ خام تیل کی قیمت تقریباً 79 ڈالر فی بیرل تک پہنچ گئی، جبکہ امریکی خام تیل (ڈبلیو ٹی آئی) تقریباً 74 ڈالر فی بیرل پر ٹریڈ کرتا رہا۔
حالیہ کمی کے بعد خام تیل کی قیمتیں دوبارہ جون کے وسط کے قریب کی سطح پر آ گئی ہیں، یعنی اس دور کے آس پاس جب ایران اور امریکہ نے تنازع کے حل کے لیے مذاکرات پر مبنی ایک عارضی معاہدے کا اعلان کیا تھا۔