(ویب ڈیسک)پاکستان کرکٹ ٹیم کے سابق کپتان اظہر علی کا کہنا ہے کہ ان کی شادی ارینج میرج ہے اور انھیں اہلیہ سے دوسری شادی کرنے کی اجازت بھی ہے۔
تفصیلات کے مطابق اظہر علی حال ہی میں ایک نجی پوڈکاسٹ میں شریک ہوئے جس دوران میزبان نے ان سے ان کی پہلی شادی اور دوسری شادی کے ارادے سے متعلق سوال کیا۔
پہلی شادی سے متعلق سوال کے جواب میں اظہر علی کا کہنا تھا کہ میری شادی 2007 میں ہوئی تھی جو گھر والوں کی مرضی سے تھی، اس کے بعد اہلیہ سے محبت ہوگئی، تین بیٹے ہیں اور ابھی تک میری ایک ہی شادی ہے۔
دوسری شادی کے سوال پر اظہر علی کا کہنا تھا کہ مجھے گھر سے دوسری شادی کی اجازت ہے لیکن دیکھنا یہ ہے کہ اس فیصلے سے میری زندگی بہتر ہوگی یا مشکل میں پڑ جائے گی؟ دوسری شادی کا فیصلہ دیکھ کر کروں گا، اگر وقت مناسب ہوا اور کوئی اچھی لڑکی مل گئی تو پھر فیصلہ کروں گا لیکن ابھی ایسی کوئی صورتحال نہیں۔
بیوی سے دوسر ی شادی کی اجازت ملنے سے متعلق سابق کرکٹر کا کہنا تھا اگر چہ کسی بھی بیوی کیلئے دوسری شادی کی اجازت دینا مشکل ہے، وہ بھی انسان ہے اس اجازت سے برا محسوس کرتی ہے لیکن اس کے باوجود میری اہلیہ نے مجھے اجازت دی ہوئی ہے۔
اظہر علی کا مزید کہنا تھا کہ میں اہلیہ سے کچھ نہیں چھپاتا، کوئی بھی مسئلہ ان سے شیئر کر لیتا ہوں، اہلیہ کو مجھ پر بھروسہ ہے، شاید یہی وجہ ہے کہ انھوں نے دوسری شادی کی اجازت دی ہوئی ہے۔