ویب ڈیسک: انسٹا گرام نے ایک نئے فیچر "پکس" (Picks) کی آزمائش شروع کر دی ہے، جس کا مقصد صارفین کو اپنی مشترکہ دلچسپیوں کی بنیاد پر ایک دوسرے سے قریب لانا ہے۔ کمپنی کے مطابق یہ فیچر اس وقت صرف اندرونی طور پر ٹیسٹ کیا جا رہا ہے اور عام صارفین کے لیے فی الحال دستیاب نہیں۔
اس نئے فیچر کے تحت صارفین اپنی پسندیدہ فلموں، کتابوں، ٹی وی شوز، ویڈیو گیمز اور میوزک کا انتخاب کر سکیں گے، جنہیں "پکس" کہا جائے گا۔ اس کے بعد انسٹا گرام صارف کو یہ دکھائے گا کہ اس کے کون سے دوستوں نے وہی دلچسپیاں منتخب کی ہیں۔ کمپنی کا کہنا ہے کہ اس فیچر کا مقصد صارفین کو اپنے دوستوں کے ساتھ زیادہ قریب لانا اور مشترکہ موضوعات پر بات چیت کو فروغ دینا ہے۔
اگرچہ انسٹا گرام نے اس فیچر کی مزید تکنیکی تفصیلات شیئر نہیں کیں، لیکن اندازہ ہے کہ یہ نیا آپشن پلیٹ فارم پر ذاتی روابط کو مضبوط بنانے میں اہم کردار ادا کرے گا۔ انسٹا گرام کے سربراہ ایڈم موسیری پہلے ہی اعلان کر چکے ہیں کہ 2025 کو وہ "دوستوں سے تعلق اور تخلیق کا سال" بنانے کا ارادہ رکھتے ہیں۔
ایڈم موسیری کے مطابق کمپنی آنے والے مہینوں میں میسجنگ فیچرز پر زیادہ توجہ دے گی، مواد کے معیار کو بہتر بنائے گی اور ایسے نئے ذرائع تلاش کرے گی جو صارفین کے درمیان مضبوط رابطے قائم کریں۔ "پکس" فیچر انہی اقدامات کی ایک کڑی سمجھا جا رہا ہے۔
چونکہ یہ فیچر ابھی ٹیسٹنگ مرحلے میں ہے، اس لیے یہ واضح نہیں کہ عام صارفین اسے کب استعمال کر سکیں گے۔ تاہم ماہرین کا کہنا ہے کہ اگر یہ کامیاب ثابت ہوا تو انسٹا گرام کے سوشل انٹریکشن کے انداز میں نمایاں تبدیلی لا سکتا ہے۔