ویب ڈیسک: پنجاب کی جیلوں میں مقید اسیران سے عیدالاضحیٰ کے پہلے اور دوسرے دن خصوصی ملاقات کی اجازت دی گئی ہے۔
تفصیلات کے مطابق آئی جی جیل خانہ جات پنجاب میاں فاروق نزیر کی جانب سے تمام سپرٹینڈنٹ جیلز کو خصوصی ملاقات کیلئے انتظامات کرنے کی ہدایت کی گئی ہے۔تمام سپرٹینڈنٹ جیلز کو ہدایت کی گئی ہے کہ کسی بھی ناخوشگوار واقعہ سے بچنے کیلئے سیکیورٹی کے سخت انتظامات کئے جائیں۔
اسیران کے ملاقاتیوں کو بعد از چیکنگ کھانا جمع کروانے کی اجازت دی جائے۔ ملاقاتیوں کی سہولت کیلئے سپیشل ڈیوٹیاں لگائی جائیں۔ملاقات کے دوران بدعنوانی کے امکانات کے خاتمے کیلئے سپرٹینڈنٹ جیل ، ڈپٹی سپرٹینڈنٹ جیل اور ڈیوٹی آفیسر انتظار گاہ اور ملاقات شیڈ کے مسلسل وزٹ کریں۔
تمام سپرٹینڈنٹ جیلز مخیر حضرات سے قربانی کے گوشت کی وصولی کر کے اگلے روز اسیران کے ڈنر کا بندوست کریں اور رپورٹ صدر دفتر ارسال کریں۔ سنٹرل مانیٹرنگ سسٹم کے ذریعے خصوصی ملاقات کے انتظامات کی نگرانی کی جائے گی اور کسی بھی قسم کی بے ضابطگی کو ہر گز نظر انداز نہیں کیا جائے گا۔
عیدالاضحیٰ کے پہلے اور دوسرے دن صرف فیملی ممبران کو ملاقات کی اجازت ہوگی۔ دوست احباب و دیگر افراد ملاقات کیلئے آنے کی تکلیف مت کریں ورنہ انھیں پریشانی کا سامنا کرنا پڑ سکتا ہے۔
اس کے ساتھ ساتھ ریجنل ڈی آئی جیز کو بھی ہدایت کی گئی ہے کہ وہ اپنی متعلقہ جیلوں کے اچانک دورے کر کے انتظامات کا جائزہ لیں اور رپورٹ صدر دفتر ارسال کریں۔