ویب ڈیسک: پاکستان کے معروف گلوکار، اداکار اور موسیقار علی ظفر نے کینیڈا کے شہر مسی ساگا میں ایک شاندار اوپن ایئر کانسرٹ کے دوران نیا ریکارڈ قائم کر دیا۔
یہ تاریخی میوزیکل ایونٹ مسی ساگا کے مشہور مقام سیلبریشن اسکوائر میں منعقد ہوا، جہاں تقریباً 45 ہزار افراد نے شرکت کی۔ منتظمین کے مطابق یہ اس مقام کی تاریخ کا سب سے بڑا میوزیکل اجتماع تھا۔
شرکاء کی بڑی تعداد کے باعث مجمع صرف سیلبریشن اسکوائر تک محدود نہ رہا بلکہ اطراف کی سڑکوں اور قریبی عمارتوں کے احاطے تک پھیل گیا، جس نے پورے علاقے کو موسیقی اور جوش و خروش سے بھر دیا۔
یہ کانسرٹ علی ظفر کے “روشنی ٹور 2026” کے شمالی امریکا مرحلے کا اختتامی شو تھا، جس میں پاکستان، بھارت، بنگلا دیش سمیت مختلف جنوبی ایشیائی ممالک سے تعلق رکھنے والے ہزاروں افراد نے شرکت کی۔ پروگرام میں بچوں، نوجوانوں، خاندانوں اور بزرگوں پر مشتمل متنوع سامعین نے بھرپور شرکت کی۔
کانسرٹ کا سب سے یادگار لمحہ اس وقت سامنے آیا جب علی ظفر نے اپنا مقبول گانا “جھوم” پیش کیا، جس پر ہزاروں مداحوں نے اپنے موبائل فونز کی لائٹس روشن کر کے پورے مقام کو روشنیوں کے سمندر میں بدل دیا۔
بعد ازاں علی ظفر اسٹیج سے اتر کر مداحوں کے درمیان بھی پہنچے، جہاں شرکاء نے ان کا پرتپاک استقبال کیا اور زبردست جوش و خروش کا اظہار کیا۔
پروگرام کے اختتام پر مداح دیر تک ان کے ساتھ گاتے رہے، جبکہ منتظمین اور شرکاء نے اس شام کو مسی ساگا کی ثقافتی تاریخ کے یادگار ترین اور سب سے بڑے ایونٹس میں سے ایک قرار دیا۔