اب یوٹیوب شارٹس بنانا اور  بھی آسان ہو جائے گا

(ویب ڈیسک ) اب آرٹی فیشل انٹیلی جنس (اے آئی) ٹیکنالوجی سے یوٹیوب شارٹس بنانے کا کام اور بھی زیادہ آسان ہوجائے گا۔

کمپنی کی جانب سے گوگل ڈیپ مائنڈ کا اے آئی ویڈیو جنریشن ماڈل ویو 2 (Veo) یوٹیوب شارٹس کا حصہ بنایا جا رہا ہے۔ویو 2 اور ڈریم اسکرین اے آئی ٹولز کے ذریعے صارفین اے آئی ٹیکنالوجی پر مبنی مختصر ویڈیوز تحریری ہدایات کے ذریعے تیار کرسکیں گے۔

قبل ازیں ڈریم اسکرین کو ویو کے اولین ورژن میں ویڈیو بیک گراؤنڈز بنانے کے لیے استعمال کیا جاتا تھا۔تاہم  ویو 2 زیادہ بہتر ماڈل ہے جس کے ذریعے آپ نہ صرف بیک گراؤنڈز بلکہ کردار اور اشیا بھی ویڈیو کے لیے تیار کرسکیں گے۔

اس حوالے سے کمپنی کا کہنا ہے کہ  اس اپ گریڈ سے ڈریم اسکرین کو زیادہ تیزی سے بنانا ممکن ہوگا اور یہ ماڈل آپ کی تحریری ہدایات کو سمجھنے کے حوالے سے زیادہ بہتر ہوگا اور حقیقت کے قریب ویڈیوز تیار کرے گا۔

پہلے سے بہتر ڈریم اسکرین ٹول کو آزما نے کیلئے  شارٹس کیمرا اوپن کریں اور وہاں گرین اسکرین کا انتخاب کرکے تحریر کریں کہ آپ کیا چاہتے ہیں، جبکہ یوٹیوب کی جانب سے پہلے سے کسی شارٹس ویڈیو میں موجود اے آئی کلپ کو ایڈ کرنے کی سہولت بھی فراہم کی جائے گی، اس کے بعد create بٹن پر کلک کرکے مزید تحریری ہدایات دیں۔

اس کے بعد ویو 2 سب کام خود سنبھال لے گا اور چند سیکنڈوں میں شارٹس ویڈیو تیار ہو جائے گی۔

خیال رہے کہ  2023 میں کمپنی کی جانب سے یوٹیوب شارٹس کے لیے ڈریم اسکرین نامی اے آئی فیچر متعارف کرایا گیا تھا جس کا مقصد صارفین کو تحریری ہدایات سے ویڈیوز کے لیے بیک گراؤنڈ تیار کرنے میں مدد فراہم کرنا تھا۔

ویو 2 کی جانب سے بنائے گئے  کلپس میں واٹر مارک کے ذریعے نشاندہی کی جائے گی کہ انہیں اے آئی سے تیار کیا گیا ہے۔

فی الحال یہ فیچر  امریکا، کینیڈا، آسٹریلیا اور نیوزی لینڈ میں متعارف کرایا جا رہا ہے اور دیگر ممالک میں صارفین کو مستقبل قریب میں دستیاب ہوگا۔