ویب ڈیسک: ایک نئی تحقیق میں انکشاف ہوا ہے کہ جن افراد کی خوراک میں سرخ گوشت زیادہ شامل ہوتا ہے، ان میں ذیابیطس کا خطرہ نمایاں طور پر بڑھ جاتا ہے۔
یہ مطالعہ British Journal of Nutrition میں شائع ہوا، جس میں پروسیسڈ اور غیر پروسیسڈ سرخ گوشت کے استعمال اور ذیابیطس کے درمیان تعلق کا جائزہ لیا گیا۔ تحقیق کے لیے National Health and Nutrition Examination Survey کے 34 ہزار سے زائد بالغ افراد کے ڈیٹا کا تجزیہ کیا گیا۔
نتائج کے مطابق سب سے زیادہ سرخ گوشت استعمال کرنے والے افراد میں ذیابیطس ہونے کا امکان تقریباً 49 فیصد زیادہ پایا گیا، حتیٰ کہ عمر، وزن، طرزِ زندگی اور دیگر غذائی عوامل کو مدنظر رکھنے کے بعد بھی یہ تعلق برقرار رہا۔ روزانہ گوشت کی ایک اضافی مقدار ذیابیطس کے خطرے میں اوسطاً 16 فیصد اضافہ کر سکتی ہے۔
خطرہ کم کرنے کے طریقے
ماہرین کے مطابق جینیات، موٹاپا، غیر متحرک طرزِ زندگی اور غیر متوازن خوراک ذیابیطس کے بڑے اسباب ہیں۔ تاہم صحت مند غذا، باقاعدہ ورزش اور وزن میں کمی سے ٹائپ 2 ذیابیطس کے خطرے کو تقریباً 50 فیصد تک کم کیا جا سکتا ہے۔
سرخ گوشت کے بجائے دالیں، سبزیاں، ہول گرینز، مرغی اور ڈیری مصنوعات نسبتاً بہتر متبادل ثابت ہو سکتے ہیں۔
اہم وضاحت
ماہرین نے واضح کیا کہ یہ ایک مشاہداتی تحقیق ہے، اس لیے یہ ثابت نہیں کرتی کہ سرخ گوشت براہِ راست ذیابیطس کا سبب بنتا ہے، بلکہ دونوں کے درمیان تعلق کی نشاندہی کرتی ہے۔ تاہم نتائج اس بات کو تقویت دیتے ہیں کہ خوراک کا انتخاب ذیابیطس کے خطرے میں اہم کردار ادا کرتے ہیں۔