ویب ڈیسک: معروف برطانوی اداکارہ ایما واٹسن، جنہوں نے ہیری پوٹر فلم سیریز میں ہرمائنی گرینجر کا کردار ادا کیا تھا، کو چھ ماہ کے لیے ڈرائیونگ پر پابندی کا سامنا کرنا پڑا ہے۔
عدالتی دستاویزات کے مطابق، ایما واٹسن نے 31 جولائی 2024 کی شب آکسفورڈ میں 30 میل فی گھنٹہ کی حد سے تجاوز کرتے ہوئے 38 میل فی گھنٹہ کی رفتار سے گاڑی چلائی۔
عدالت کو بتایا گیا کہ واٹسن کے ڈرائیونگ لائسنس پر پہلے ہی 9 پوائنٹس موجود تھے، اور یہ واقعہ ان پوائنٹس میں مزید اضافہ کا باعث بنا۔
جرمانہ اور ڈرائیونگ پر پابندی
35 سالہ اداکارہ پر £1,044 پاؤنڈ (تقریباً 4 لاکھ پاکستانی روپے) جرمانہ عائد کیا گیا، اور ہائی وکومب میجسٹریٹس کورٹ نے انہیں چھ ماہ کیلئے ڈرائیونگ سے نااہل قرار دیا۔
ایما واٹسن سماعت کے دوران عدالت میں موجود نہیں تھیں۔
تعلیم اور حالیہ سرگرمیاں
ایما واٹسن 2023 سے آکسفورڈ یونیورسٹی میں کریئیٹو رائٹنگ میں ماسٹرز کر رہی ہیں۔
وہ 2001 میں پہلی ہیری پوٹر فلم سے شہرت کی بلندیوں پر پہنچیں اور پھر آٹھوں فلموں میں جلوہ گر ہوئیں۔
بعد ازاں وہ Beauty and the Beast، The Bling Ring، اور Little Women جیسی فلموں میں بھی اداکاری کر چکی ہیں۔
2023 میں انہوں نے اپنے بھائی کے ساتھ مل کر سستے اور ماحول دوست جِن برانڈ کی لانچنگ بھی کی۔
دوسری اداکارہ بھی جرمانے کی زد میں
دلچسپ طور پر، اسی دن اور اسی عدالت میں ہیری پوٹر فلم کی ایک اور اداکارہ زوئی ونامیکر (جو فلم میں میڈم ہوچ کے کردار میں نظر آئیں) پر بھی اسی جرم میں £1,044 کا جرمانہ عائد کیا گیا۔
76 سالہ ونامیکر کو M4 موٹر وے پر 40 میل فی گھنٹہ کی حد سے تجاوز کرتے ہوئے 46 میل فی گھنٹہ کی رفتار سے گاڑی چلاتے ہوئے پکڑا گیا۔
دونوں اداکاراؤں کو تین مزید پوائنٹس ملنے کے بعد، موجودہ قانون کے تحت چھ ماہ کیلئے ڈرائیونگ پر پابندی لگا دی گئی۔