برطانوی شاہی خاندان میں پھوٹ،کنگ چارلس کیلئے نیا چیلنج

ویب ڈیسک: صحت کے مسائل سے نبرد آزما بادشاہ چارلس سوئم اس وقت ایک نئے خاندانی بحران کا سامنا کر رہے ہیں، کیونکہ شہزادہ ہیری کے شاہی سیکیورٹی کی فراہمی کے مقدمے اور ان کے غیر روایتی فیصلوں نے شاہی خاندان کو دو دھڑوں میں تقسیم کر دیا ہے۔

دی نیوز انٹرنیشنل کی رپورٹ میں ذرائع سے کہا گیاہے کہ 76 سالہ بادشاہ چارلس خاندان میں اتحاد برقرار رکھنے کے لیے اہم فیصلے کرنے پر غور کر رہے ہیں، جن میں شہزادی بیٹریس، شہزادی یوجینی اور زارا ٹنڈال کو زیادہ فعال کردار دینا شامل ہے۔ یہ تینوں نوجوان شاہی افراد شہزادہ ہیری کے مؤقف سے ہم آہنگ سمجھے جاتے ہیں۔

شاہی خاندان میں دو دھڑے بن گئے:
سابق شاہی بٹلر پال برَل نے جی بی نیوز اور جینٹنگ کیسینو سے بات کرتے ہوئے انکشاف کیا کہ شاہی خاندان اب "دو کیمپوں" میں بٹ چکا ہے۔ ان کے مطابق شہزادہ ہیری اپنی کزنز بیٹریس اور یوجینی کے قریب ہیں کیونکہ وہ ایک ہی نسل سے تعلق رکھتے ہیں اور روایتی شاہی اصولوں سے متفق نہیں۔

برل کے مطابق: "شہزادہ ہیری، یوجینی اور بیٹریس آج کی حقیقی دنیا میں رہتے ہیں، جبکہ بیشتر شاہی افراد اب بھی روایتی انداز میں جیتے ہیں۔"

انہوں نے کہا کہ بیٹریس اور یوجینی کو عوام کے ساتھ گھلنا ملنا پڑتا ہے، بس پکڑنی پڑتی ہے اور سڑکوں پر چلنا پڑتا ہے – اس لحاظ سے وہ ہیری کی جدوجہد کو بہتر سمجھتے ہیں۔

سینئر شاہی افراد ہیری کے مخالف کیمپ میں

دوسری طرف، شہزادہ ولیم، بادشاہ چارلس اور دیگر سینئر شاہی افراد شہزادہ ہیری کے اقدامات اور ان کے برطانیہ میں سیکیورٹی کی بحالی کے لیے قانونی جنگ سے نالاں ہیں۔

ہیری اور ولیم کے تعلقات اب اتنے خراب ہو چکے ہیں کہ ماہرین انہیں " اجنبی بھائی" قرار دے رہے ہیں۔

اگرچہ شہزادہ ہیری کو اپنے چچا شہزادہ اینڈریو اور سارہ فرگوسن کی بیٹیوں کا مکمل ساتھ حاصل ہے، لیکن ان کے دیگر شاہی رشتہ دار ان سے فاصلے پر نظر آتے ہیں۔

نوجوان شاہی افراد کا بڑھتا کردار

شہزادہ ہیری کے ساتھ ہمدردی رکھنے والے نوجوان شاہی افراد – شہزادی بیٹریس، یوجینی اور زارا ٹنڈال – شاہی نظام میں نیا، عملی اور عوامی نقطہ نظر لارہے ہیں اور اب انہیں ممکنہ طور پر اہم شاہی کردار سونپنے کی منصوبہ بندی کی جا رہی ہے۔

بادشاہ چارلس کا یہ قدم خاندان میں اتحاد قائم رکھنے اور روایتی شاہی نظام کو جدید تقاضوں سے ہم آہنگ کرنے کی کوشش سمجھا جا رہا ہے۔