ویب ڈیسک: بلوچستان کے ضلع قلات میں دہشتگردوں نے سکیورٹی فورسز کی چوکی پر حملہ کیا ہے، اور دوران فائرنگ کے تبادلے میں 6 دہشتگرد ہلاک جبکہ 7 جوان شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے ضلع قلات کے علاقے شاہ مردان میں سیکیورٹی فورسز کی چوکی پر حملہ کیا،سکیورٹی فورسز کے جوانوں نے بہادری سے دہشتگردوں کا مقابلہ کیا اور 6 دہشتگردوں کو ہلاک کردیا جبکہ 4 دہشتگرد زخمی بھی ہوگئے۔
فوج کے شعبہ تعلقات عامہ کے مطابق فائرنگ کے تبادلے میں 7 بہادر جوانوں نے شہادت کو گلے لگایا،آئی ایس پی آر نے بتایا کہ علاقے میں کسی بھی دہشتگرد کو ختم کرنے کے لیے کلیئرنس آپریشن جاری ہے۔
فوج کے شعبہ تعلقات عامہ نے کہاکہ پاکستان کی سیکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں، ہمارے جوانوں کی ایسی قربانیاں ہمارے عزم کو مزید مضبوط کرتی ہیں۔