ویب ڈیسک: روسی فیڈریشن کے مسلمانوں کی مذہبی انتظامیہ نے مسجدِ نبوی ﷺ کے امام و خطیب، شیخ ڈاکٹر عبداللہ بن عبدالرحمن البعیجان کو روسی مسلمانوں کا اعلیٰ ترین اعزاز عطا کیا ہے۔ یہ اعزاز انہیں روس کے سرکاری دورے کے دوران ایک خصوصی تقریب میں پیش کیا گیا، جس میں روسی مذہبی رہنماؤں اور سرکاری شخصیات نے شرکت کی۔
مذہبی انتظامیہ کے مطابق، شیخ عبداللہ البعیجان کو یہ اعزاز اسلام اور مسلمانوں کی خدمت، دعوت و رہنمائی کے میدان میں ان کی نمایاں خدمات، اور مسجدِ نبوی ﷺ کے منبر سے اعتدال، رواداری اور صحیح دینی فہم کے فروغ کے اعتراف میں دیا گیا ہے۔
روسی اسلامی قیادت نے کہا کہ شیخ البعیجان کی تعلیمات امتِ مسلمہ میں اتحاد اور فکری توازن کے فروغ میں اہم کردار ادا کر رہی ہیں۔ انہوں نے مزید کہا کہ ان کے خطبات نے نوجوان نسل کو معتدل اسلامی فکر سے روشناس کرایا ہے۔
شیخ عبداللہ البعیجان نے اعزاز وصول کرتے ہوئے روسی مذہبی قیادت کا شکریہ ادا کیا اور کہا کہ یہ اعزاز مسجدِ نبوی ﷺ کے پیغامِ ہدایت اور امت کے اتحاد کی اہمیت کا عالمی اعتراف ہے۔ انہوں نے روس کے مسلمانوں کے ساتھ علمی اور دینی تعاون کو مزید مضبوط بنانے کے عزم کا اظہار بھی کیا۔