ویب ڈیسک: نیوزی لینڈ کے اوپنرز ٹام لیتھم اور ڈیون کانوے نے ٹیسٹ کرکٹ کی تاریخ میں ایک نیا سنگ میل عبور کیا ہے، جب دونوں کھلاڑیوں نے دونوں اننگز میں سنچریاں اسکور کر کے ایک غیر معمولی ریکارڈ اپنے نام کیا۔ یہ پہلی مرتبہ ہے کہ ٹیسٹ کرکٹ کی تاریخ میں کسی ٹیم کے دونوں اوپنرز نے دونوں اننگز میں سنچریاں بنائیں۔
ویسٹ انڈیز کے خلاف جاری تیسرے ٹیسٹ میچ میں نیوزی لینڈ کے ٹام لیتھم اور ڈیون کانوے نے شاندار بیٹنگ کا مظاہرہ کیا۔ دوسری اننگز میں ٹام لیتھم نے 101 رنز بنائے جبکہ ڈیون کانوے نے 100 رنز کی اہم اننگز کھیلی۔ اس سے پہلے، پہلی اننگز میں ٹام لیتھم نے 137 رنز جبکہ ڈیون کانوے نے 227 رنز کی شاندار اننگز کھیل کر اپنے ریکارڈ کا آغاز کیا تھا۔
خاص طور پر، ڈیون کانوے ایک منفرد اعزاز کے حامل کھلاڑی بن گئے ہیں کیونکہ وہ ایک ہی ٹیسٹ میچ میں ڈبل سنچری اور سنچری بنانے والے نیوزی لینڈ کے پہلے بیٹر بن گئے ہیں۔
ماونٹ مونگانوئی میں ویسٹ انڈیز کے خلاف کھیلے گئے اس میچ کی دوسری اننگز میں ڈیون کانوے نے سنچری بنائی جبکہ انہوں نے پہلی اننگز میں 227 رنز بنائے تھے۔ ان کی اس شاندار بیٹنگ نے نیوزی لینڈ کو میچ میں اہم برتری دلانے میں مدد فراہم کی۔