(ویب ڈیسک ) آئینی ترمیم کے بعد پارلیمانی کمیٹی برائے ججز تقرری میں نمائندگی کا طریقہ کار بھی تبدیل کردیا گیا۔
ذرائع کے مطابق پارلیمانی کمیٹی میں حکومت اپوزیشن کی نمائندگی یکساں نہیں ہوگی ۔ متناسب نمائندگی کے حساب سے پارلیمانی کمیٹی برائے ججز تقرری میں نمائندگی دی جائے گی ۔
ذرائع کا کہنا ہے کہ متناسب نمائندگی کے حساب سے پارلیمانی کمیٹی میں مسلم لیگ ن ،پیپلز پارٹی ، سنی اتحاد کونسل ،ایم کیو ایم اور جے یو آئی ف کی نمائندگی ہوگی ۔ باقی کسی جماعت کا کوئی رکن پارلیمانی کمیٹی میں شامل نہیں ہوگا۔
ذرائع کے مطابق حکمران جماعت مسلم لیگ ن کو پارلیمانی کمیٹی میں برتری ہوگی ، مسلم لیگ ن کے قومی اسمبلی سے تین اور سینیٹ سے ایک رکن پارلیمانی کمیٹی میں شامل ہوگا ، پیپلز پارٹی کے قومی اسمبلی سے دو اور سینیٹ سے ایک رکن کمیٹی میں شامل ہونگے۔
اسی طرح سنی اتحاد کونسل کے بھی قومی اسمبلی سے دو اور سینیٹ سے ایک رکن شامل ہوگا، ایم کیو ایم کے ایک رکن کو قومی اسمبلی سے نمائندگی ملے گی ، جے یو آئی ف کے ایک رکن کو سینیٹ سے نمائندگی ملے گی۔
ذرائع نے بتایا ہے کہ پارلیمانی کمیٹی کی تشکیل پر کام جاری ہے، مذکورہ پارلیمانی جماعتوں کی طرف سے نام موصول ہوتے ہی کمیٹی کے قیام کا نوٹیفکیشن جاری کردیا جائے گا ۔