ویب ڈیسک: کرکٹ شائقین، خصوصاً پاکستان کی گرین شرٹس کے حامیوں کے لیے 15 فروری ایک غیر معمولی اور تاریخی دن ثابت ہونے جا رہا ہے، جب پاکستان اور بھارت ایک ہی دن میں دو مرتبہ آمنے سامنے ہوں گے۔
اگرچہ ماضی میں پاکستان اور بھارت ایک ہی ٹورنامنٹ میں دو بار ایک دوسرے کے مدمقابل آ چکے ہیں، تاہم یہ کرکٹ کی تاریخ میں پہلی مرتبہ ہوگا کہ پاکستان کی دو مختلف ٹیمیں ایک ہی دن اپنے روایتی حریف بھارت کے خلاف میدان میں اتریں گی۔
کرکٹ ماہرین پہلے ہی 15 فروری کو ایک یادگار اور تاریخی تاریخ قرار دے رہے ہیں۔ اگرچہ انگلینڈ اور آسٹریلیا کو کرکٹ کے قدیم ترین حریف سمجھا جاتا ہے، لیکن پاکستان اور بھارت کے درمیان ہونے والے مقابلے دنیا بھر میں سب سے زیادہ جوش و خروش اور ناظرین کی توجہ حاصل کرتے ہیں، چاہے وہ ٹی وی اسکرین ہو یا آن لائن پلیٹ فارمز۔
ان دونوں مقابلوں میں سے پہلا میچ کولمبو میں کھیلا جائے گا، جہاں آئی سی سی مینز ٹی ٹوئنٹی ورلڈ کپ کے دوران پاکستان اور بھارت کے درمیان بڑا مقابلہ ہوگا۔ یہ ٹورنامنٹ 7 فروری سے شروع ہو رہا ہے اور اس کی میزبانی بھارت اور سری لنکا مشترکہ طور پر کر رہے ہیں۔
اسی دن دوسرا پاکستان بھارت مقابلہ بنکاک میں کھیلا جائے گا، جہاں دونوں ممالک کی خواتین ٹیمیں ویمنز ایشیا کپ رائزنگ اسٹارز ٹورنامنٹ میں ایک دوسرے کے مدمقابل ہوں گی۔ ایشین کرکٹ کونسل نے اس ایونٹ کا شیڈول باضابطہ طور پر جاری کر دیا ہے۔
ویمنز ایشیا کپ رائزنگ اسٹارز ایک آٹھ ٹیموں پر مشتمل ٹی ٹوئنٹی ٹورنامنٹ ہے جو 13 سے 22 فروری تک بنکاک، تھائی لینڈ میں منعقد ہوگا۔ ٹیموں کو چار چار کے دو گروپس میں تقسیم کیا گیا ہے، جہاں ہر گروپ کی ٹاپ دو ٹیمیں سیمی فائنل کے لیے کوالیفائی کریں گی۔
پاکستان اور بھارت کو گروپ اے میں متحدہ عرب امارات اور نیپال کے ساتھ رکھا گیا ہے، جبکہ گروپ بی میں بنگلہ دیش، سری لنکا، ملائیشیا اور میزبان تھائی لینڈ شامل ہیں۔
پاکستان کی خواتین ٹیم اپنے مہم کا آغاز 13 فروری کو نیپال کے خلاف کرے گی، جبکہ گروپ مرحلے کا آخری میچ 17 فروری کو متحدہ عرب امارات کے خلاف کھیلا جائے گا۔ گروپ مرحلہ 18 فروری کو اختتام پذیر ہوگا، سیمی فائنلز 20 فروری کو ہوں گے جبکہ ٹورنامنٹ کا فائنل 22 فروری کو کھیلا جائے گا۔