ویب ڈیسک: برطانوی وزیراعظم کیئر اسٹارمر کے مستعفی ہونے کے اعلان کے بعد اب نگاہیں آئندہ وزیراعظم کے انتخاب پر مرکوز ہو گئی ہیں۔
اسٹارمر نے اپنے عہدے سے دستبرداری کا اعلان کرتے ہوئے کہا کہ قیادت میں ایک نئے باب کے آغاز کا وقت آ گیا ہے۔ برطانوی میڈیا کے مطابق ان کے بعد وزارتِ عظمیٰ کے لیے سب سے مضبوط امیدوار کے طور پر اینڈی برنہم کا نام سامنے آ رہا ہے۔ اینڈی برنہم اس وقت گریٹ مانچسٹر کے میئر ہیں اور لیبر پارٹی کی نمایاں سیاسی شخصیات میں شمار ہوتے ہیں۔ وہ ماضی میں رکنِ پارلیمنٹ اور حکومتی وزیر بھی رہ چکے ہیں اور انہیں پارٹی کے روایتی بائیں بازو کے نظریات کا نمایاں نمائندہ سمجھا جاتا ہے۔
اینڈی برنہم کو “کنگ آف دی نارتھ” کیوں کہا جاتا ہے؟
اینڈی برنہم کو اکثر “کنگ آف دی نارتھ” (شمال کا بادشاہ) کہا جاتا ہے، جو مقبول ٹی وی سیریز گیم آف تھرونز کے کردار سے منسوب ایک علامتی لقب ہے۔ یہ نام انہیں شمالی انگلینڈ کے حقوق اور مفادات کے بھرپور دفاع کے باعث ملا، اور وہ 2017 سے اب تک متعدد بار گریٹ مانچسٹر کے میئر منتخب ہو چکے ہیں۔
قیادت کی دوڑ میں برنہم کی پوزیشن کیوں مضبوط ہوئی؟
حالیہ دنوں میں میکر فیلڈ کے ضمنی انتخاب میں ان کی نمایاں کامیابی کے بعد ان کی سیاسی حیثیت مزید مضبوط ہوئی ہے۔ اس نتیجے نے لیبر پارٹی کے اندر قیادت کی تبدیلی سے متعلق بحث کو دوبارہ تیز کر دیا ہے، اور کئی مبصرین انہیں اسٹارمر کے ممکنہ اہم حریف کے طور پر دیکھ رہے ہیں۔
رپورٹس کے مطابق ان کی انتخابی کامیابی نے پارٹی کے بعض حلقوں میں اس رائے کو تقویت دی ہے کہ وہ مستقبل میں نائجل فراج اور ان کی جماعت کے بڑھتے ہوئے اثر و رسوخ کا مؤثر مقابلہ کر سکتے ہیں۔
وزارتِ عظمیٰ کی دوڑ میں سب سے آگے؟
برطانوی اور بین الاقوامی میڈیا کے مطابق اینڈی برنہم اس وقت لیبر پارٹی کی قیادت اور بالآخر وزارتِ عظمیٰ کے لیے سب سے مضبوط امیدوار تصور کیے جا رہے ہیں، تاہم حتمی فیصلہ پارٹی کے اندرونی انتخابی عمل اور ممکنہ قیادت کے مقابلے کے بعد سامنے آئے گا۔