اسلام آباد: خاتون جج کو دھمکیاں دینے کے مقدمے میں چیئرمین تحریک انصاف عمران خان پر آج فرد جرم عائد کی جائے گی۔ تفصلات کے مطابق اسلام آباد ہائیکورٹ میں عمران خان کے خلاف توہین عدالت کیس کی سماعت آج اڑھائی بجے ہوگی، توہین عدالت کیس میں چیئرمین پی ٹی آئی عمران خان پر آج فرد جرم عائد ہونے کا امکان ہے۔ عمران خان کی اسلام آباد ہائیکورٹ پیشی کے حوالے سے پولیس سکیورٹی آرڈر جاری کر دیا گیا ہے، آج کی پیشی پر2 ایس پیز سمیت 710 افسران و اہلکار تعینات کیے گئے ہیں، سیف سٹی کے کیمروں کی مدد سے ہائیکورٹ کے گرد مانیٹرنگ بھی کی جائے گی۔اسلام آباد ہائیکورٹ کے اطراف خاردار تاریں لگا کر راستہ بند کردیا گیا ہے، 500 شارٹ رینج اور 500 لانگ رینج آنسو گیس شیل اور شیلنگ والی بکتر بند گاڑیاں موجود ہوں گی۔ اس کے علاوہ پولیس لائنز میں 3 ہزار شیل اور گاڑیاں تیار کھڑی ہوں گی۔ ہائیکورٹ کے اندر حفاظتی انتظامات کی ذمہ داری سکیورٹی ڈویژن کی ہو گی، اسلام آباد ہائیکورٹ کے اندر رینجرز اور ایف سی کے اہلکار بھی تعینات ہوں گے۔ سکیورٹی آرڈر کے مطابق عدالت کے روف ٹاپ کے علاوہ تمام اہلکار اور افسران غیر مسلح ہوں گے، ہائیکورٹ کے باہر سکیورٹی کی ذمہ داری ایس ایس پی آپریشنز جمیل ظفر کی ہو گی اور ڈیوٹی پر تعینات کوئی بھی اہلکار موبائل فون کا استعمال نہیں کرے گا، وائرلیس کا استعمال ڈیوٹی کیلئے ہو گا اور غیر ضروری استعمال پر محکمانہ کارروائی بھی ہو گی۔