جنسی اسمگلنگ،بھتہ خوری میں ملوث بدنام زمانہ ٹرین ڈی آراگوا گینگ کیخلاف کارروائی کاآغاز

ویب ڈیسک: امریکا میں موجود بدنام زمانہ مہاجر دہشت گرد گروہ ٹرین ڈی آراگوا (Tren de Aragua) کے خلاف پہلی بار RICO (ریکٹیرنگ انفلوئنسڈ اینڈ کرپٹ آرگنائزیشنز) قوانین کے تحت مقدمات درج کر دیے گئے ہیں۔ نیویارک کے سدرن ڈسٹرکٹ کے امریکی اٹارنی آفس نے اعلان کیا ہے کہ یہ کارروائی "آپریشن ٹیک بیک امریکا" کا حصہ ہے، جس کا مقصد غیر قانونی امیگریشن، منشیات فروش کارٹیلز اور بین الاقوامی مجرمانہ گروہوں کا خاتمہ ہے۔

27 افراد پر جنسی اسمگلنگ، قتل اور بھتہ خوری کے الزامات

فاکس نیوز کی رپورٹ کے مطابق سرکاری بیان میں کہا گیا ہے کہ ٹرین ڈی آراگوا اور اس کے ذیلی گروہ "اینٹی ٹرین" کے 27 موجودہ و سابق ارکان اور ساتھیوں پر سنگین جرائم، جن میں انسانی اسمگلنگ، جنسی غلامی، قتل، ڈکیتی، منشیات فروشی، اور غیر قانونی اسلحہ رکھنے جیسے الزامات شامل ہیں، کے تحت مقدمات قائم کیے گئے ہیں۔

امریکی اٹارنی: ’’ہم نیویارک کے شہریوں کی حفاظت کے لیے پرعزم ہیں‘‘

قائم مقام امریکی اٹارنی میتھیو پوڈالسکی نے کہا کہ "یہ فرد جرم واضح کرتی ہے کہ ہم نیویارک شہر کے قانون پسند شہریوں کی حفاظت کے لیے کسی حد تک جانے کو تیار ہیں۔ جو لوگ ہمارے معاشرے میں خوف و دہشت پھیلانا چاہتے ہیں، ان کا وقت ختم ہو چکا ہے۔"

انہوں نے بتایا کہ یہ گروہ وینزویلا سے نوجوان لڑکیوں کو اسمگل کر کے امریکا میں جنسی غلامی پر مجبور کرتا تھا، چھوٹے کاروباروں سے بھتہ لیتا، اور "توسی" نامی نشہ آور گلابی پاؤڈر فروخت کرتا تھا، جو ان کی پہچان بن چکا ہے۔

21 ملزمان حراست میں، سزا عمر قید تک ہو سکتی ہے

فی الوقت 27 میں سے 21 مشتبہ افراد امریکی حراست میں ہیں، جن میں سے 16 پہلے سے مختلف مقدمات میں قید تھے، جب کہ پانچ کو حالیہ دنوں میں گرفتار کیا گیا۔ ملزمان کی عمریں بیس سے تیس سال کے درمیان بتائی جا رہی ہیں اور بعض کو عمر قید کی متعدد سزاؤں کا سامنا ہو سکتا ہے۔

ٹرین ڈی آراگوا: ایک منظم دہشت گرد تنظیم

امریکی اٹارنی جنرل پم بونڈی کے مطابق"ٹرین ڈی آراگوا صرف ایک گینگ نہیں بلکہ ایک مکمل دہشت گرد تنظیم ہے، جو انسانی اسمگلنگ، تشدد، اور منشیات کے ذریعے امریکی معاشرے کو نقصان پہنچا رہی ہے۔ آج کی کارروائی اس تنظیم کی بنیادیں ہلا دے گی۔"

نیو یارک پولیس کمشنر جیسیکا ٹِش نے بھی کہا کہ پہلی بار TdA کو باقاعدہ ایک منظم مجرمانہ گروہ قرار دے کر قانونی کارروائی کی گئی ہے۔ انہوں نے کہا کہ گروہ کی سرگرمیوں نے نیویارک کے باسیوں کی جان و مال کو شدید خطرے میں ڈال رکھا تھا۔

ٹاسک فورس ولکن کی معاونت

اس مقدمے میں جوائنٹ ٹاسک فورس ولکن نے کلیدی کردار ادا کیا، جو اس سے قبل MS-13 جیسے خطرناک گروہوں کے خلاف بھی کام کر چکی ہے اور اب TdA جیسے بین الاقوامی مجرمانہ نیٹ ورکس کے خاتمے پر کام کر رہی ہے۔