ویب ڈیسک: لاہور کی انسداد دہشت گردی عدالت نے پاکستان تحریک انصاف (پی ٹی آئی) کے ایم پی اے شیخ امتیاز کو 10 روزہ جسمانی ریمانڈ پر پولیس کی تحویل میں دے دیا۔
تفصیلات کے مطابق پولیس نے پاکستان تحریک انصاف کے بانی اور سابق وزیر اعظم عمران خان کی گرفتاری کے وقت پولیس کے ساتھ لڑائی جھگڑے کے مقدمہ میں گرفتار پی ٹی آئی کے رہنما شیخ امتیاز کو جسمانی ریمانڈ کے لیے عدالت پیش کیا۔
تفتیشی افسر کی جانب سے ملزم کے جسمانی ریمانڈ کی استدعا کی گئی اور مؤقف اپنایا گیا کہ ملزم سے ڈنڈے، سوٹے اور موبائل برآمد کرنا ہے۔
ملزم کے وکیل نے جسمانی ریمانڈ کی استدعا کی مخالفت کی اور مؤقف اختیار کیا گیا کہ پولیس نے ایک ایم پی اے کی تذلیل کی اور جھوٹے مقدمہ میں گرفتار کر لیا۔
فریقین کے دلائل سننے کے بعد جج عرفان حیدر نے شیخ امتیاز کے جسمانی ریمانڈ کی درخواست پر فیصلہ محفوظ کرلیا۔
بعد ازاں فیصلہ سناتے ہوئے عدالت نے شیخ امتیاز کو 10 روزہ جسمانی ریمانڈ پر پولیس کے حوالے کردیا۔