(ویب ڈیسک ) معروف فوٹو شیئرنگ ایپ انسٹا گرام نے ڈائریکٹ میسجز (ڈی ایمز) میں متعدد نئے فیچرز صارفین کے لیے متعارف کرا دیے ہیں۔
کمپنی کی جانب سے گزشتہ دنوں ان فیچرز کا اعلان کیا گیا جس میں عندیہ دیا گیا کہ انسٹاگرام کے ڈائریکٹ میسجز اب ایپل آئی میسج اور دیگر ایپس کا متبادل بن گئے ہیں۔
کمپنی کا کہنا ہے کہ اب دنیا بھر میں صارفین ڈائریکٹ میسجز میں ٹرانسلیٹ ٹولز تک رسائی حاصل کرسکتے ہیں اور 99 زبانوں کے پیغامات کا ترجمہ کرسکتے ہیں۔
اس کے علاوہ ایک نیا فیچر آئی او ایس اور اینڈرائیڈ صارفین کے لیے متعارف کرایا گیا ہے جس کے ذریعے وہ میوزک شیئر کرسکیں گے۔ اس فیچر تک رسائی کے لیے چیٹ کمپوزر اسکرین میں اسٹیکر بٹن پر کلک کریں اور پھر میوزک آپشن کا انتخاب کریں۔ وہاں آپ مختلف میوزک کلپس سرچ کرسکیں گے اور 30 سیکنڈ کے کلپ کو گروپ چیٹس یا براڈکاسٹ چینل پر شیئر کرسکیں گے۔
کمپنی نے ایک نیا فیچر پن میسجز کا متعارف کرایا ہے۔ اس فیچر کے ذریعے صارفین ڈائریکٹ میسجز میں مختلف میسجز کو پن کرسکیں گے جو چیٹ ونڈو پر سب سے اوپر نظر آئیں گے۔ہر چیٹ میں صارفین 3 میسجز کو پن کرسکیں گے۔
نیا فیچر میسجز شیڈول کا ہے۔اب صارفین میسجز کو 29 دن تک کے لیے شیڈول کرسکیں گے۔