ویب ڈیسک: پاکستان کی بنگلا دیش کے خلاف دوسرے ٹیسٹ میچ میں بیٹنگ جاری ہے۔
گرین کیپس کے اوپنر ایک بار پھر اپنی ٹیم کو اچھا آغاز دینے میں ناکام رہے، پہلی وکٹ صفر پر گر گئی جب عبداللہ شفیق بغیر کھاتہ کھولے تسکین احمد کی گیند پر آؤٹ ہو گئے۔
پاکستان کا دوسرا نقصان 107 رنز کے مجموعے پر ہوا، کپتان شان مسعود57 رنز بنا کر پویلین لوٹ گئے جبکہ شاہینوں کی تیسری وکٹ 122 رنز پر گری جب صائم ایوب 58 رنز بنا کر مہدی حسن مرزا کا شکار بنے۔
دونوں ٹیموں کے درمیان دوسرا میچ راولپنڈی کرکٹ سٹیڈیم میں کھیلا جا رہا ہے، میچ کے دوسرے دن بنگال ٹائیگرز نے پاکستان کیخلاف ٹاس جیت کر پہلے فیلڈنگ کا فیصلہ کیا جبکہ دوسرے روز کے کھیل میں اوورز مکمل کرنے کے لیے 30 منٹ کی توسیع بھی کی جا سکتی ہے۔
پاکستان کی جانب سے صائم ایوب اور عبداللہ شفیق اننگز کا آغاز کرنے کیلئے آئے لیکن اوپنر بلے باز عبداللہ شفیق ایک بار پھر خاطر خواہ کارکردگی نہ دکھا سکے اور بغیر کھاتہ کھولے پہلے ہی اوور میں صفر پر آؤٹ کر پویلین چلتے بنے۔
یاد رہے کہ گزشتہ روز راولپنڈی میں ہونے والے پاکستان اور بنگلا دیش کے درمیان دوسرے ٹیسٹ کا پہلا روز بارش کے باعث منسوخ ہو گیا تھا جبکہ آج راولپنڈی میں موسم صاف ہو گیا ہے اور دوسرے روز کے کھیل کے دوران بارش کا امکان نہیں ہے۔
قومی سکواڈ
دوسرے ٹیسٹ کے لیے لیگ سپنر ابرار احمد اور فاسٹ باؤلر میر حمزہ کو ٹیم میں شامل کیا گیا ہے جبکہ شاہین شاہ آفریدی کو میچ سے ڈراپ کر دیا گیا ہے۔
قومی ٹیم کے ٹیسٹ سکواڈ میں کپتان شان مسعود، نائب کپتان سعود شکیل، ابرار احمد، محمد علی، سلمان علی آغا، صائم ایوب، بابر اعظم، میر حمزہ، وکٹ کیپر بلے باز محمد رضوان، عبداللہ شفیق اور خرم شہزاد شامل ہیں۔
بنگلا دیشی ٹیم
بنگلا دیشی ٹیم میں کپتان نجم الحسین شانتو، شادمان اسلام، ذاکر حسن، مومن الاسلام، مشفق الرحیم، لٹن داس، شکیب الحسن، مہدی حسن میراز، تسکین احمد، حسن محمود اور ناہید رانا شامل ہیں۔
یاد رہے کہ پاکستان اور بنگلا دیش کی دو میچوں کی ٹیسٹ سیریز میں بنگال ٹائیگرز کو ایک صفر کی برتری حاصل ہے، بنگلا دیش نے پہلے میچ میں شاہینوں کو 10 وکٹوں سے تاریخی شکست دی تھی۔