(ویب ڈیسک) واٹس ایپ کا نیا اسکیم الرٹ فیچر اب اینڈرائیڈ کے کچھ بیٹا صارفین کے لیے دستیاب کر دیا گیا ہے۔
گزشتہ جون میں اس فیچر کی تیاری کے بارے میں اطلاعات سامنے آئی تھیں، جبکہ میٹا نے دو ہفتے قبل باضابطہ طور پر اس کی تفصیلات بھی جاری کی تھیں۔ اگرچہ واٹس ایپ نے ابھی تک یہ نہیں بتایا کہ اسکیم الرٹ عام صارفین کے لیے کب متعارف کرایا جائے گا، تاہم بیٹا صارفین تک اس کی رسائی سے ظاہر ہوتا ہے کہ اس کی عوامی ریلیز زیادہ دور نہیں۔
یہ پیش رفت WABetaInfo کی جانب سے سامنے آئی، جس نے اینڈرائیڈ کے لیے واٹس ایپ کے بیٹا ورژن 2.26.34.1 میں اس فیچر کی موجودگی دریافت کی۔
جیسا کہ نام سے ظاہر ہے، اسکیم الرٹ صارفین کو اس وقت خبردار کرے گا جب کسی نامعلوم شخص کی جانب سے آنے والا پیغام ممکنہ طور پر فراڈ یا اسکیم پر مبنی محسوس ہو۔ خاص بات یہ ہے کہ پیغام بھیجنے والے کو معلوم نہیں ہوگا کہ وصول کنندہ کے پاس اسکیم الرٹ فیچر فعال ہے۔
جب کسی صارف کو اسکیم الرٹ کی وارننگ موصول ہوگی تو وہ بھیجنے والے کو قابلِ اعتماد (Trusted) قرار دے سکتا ہے یا اسے بلاک اور رپورٹ کر سکتا ہے۔ اگر صارف چیٹ کو Trusted قرار دیتا ہے تو وہ اس گفتگو کے آخری پانچ پیغامات واٹس ایپ کے ساتھ شیئر کرنے کا انتخاب بھی کر سکتا ہے، تاکہ اس فیچر کی درستگی مزید بہتر بنانے میں مدد مل سکے۔
یہ فیچر اختیاری ہے اور فی الحال اسے صارف کو خود فعال کرنا ہوگا۔ اینڈرائیڈ پر اسے Settings > Account میں جا کر آن کیا جا سکتا ہے۔
میٹا نے اپنی ایک باضابطہ بلاگ پوسٹ میں اسکیم الرٹ کو ایک نئے اور اختیاری فیچر کے طور پر بیان کیا ہے، جو صارف کے ڈیوائس پر موجود مشین لرننگ ماڈل کے ذریعے ممکنہ اسکیم پر مبنی پیغامات کی نشاندہی کرکے صارف کو خبردار کرتا ہے۔
میٹا کے مطابق، پیغامات کے مواد کو اسکیم کی درجہ بندی کے لیے ڈیوائس سے باہر نہیں بھیجا جاتا اور نہ ہی اسے خودکار طور پر واٹس ایپ، میٹا یا کسی اور ادارے کو رپورٹ کیا جاتا ہے۔ کمپنی کا کہنا ہے کہ یہ فیچر End-to-End Encryption کے ساتھ مطابقت رکھتے ہوئے صارف کو ممکنہ فراڈ سے خبردار کرنے کی سہولت فراہم کرتا ہے، جبکہ اسے مکمل طور پر اختیاری رکھا گیا ہے۔