(ویب ڈیسک ) ایپل کی جانب سے آئی فون 16 سیریز کا سستا ترین فون آنے والے مہینوں میں متعارف کرائے جانے کا امکان ہے۔
ایک رپورٹ میں کہا گیا ہے کہ ایپل کی جانب سے نئے کم قیمت آئی فون ایس ای کو آئی فون 16 ای کے نام سے متعارف کرائے جانے کا امکان ہے۔جس سے یہ آئی فون 16 سیریز کا حصہ بن جائے گا اور ماضی کے ایس ای ماڈلز سے مختلف ہو جائے گا۔
قبل ازیں لیکس میں بتایا گیا تھا کہ آئی فون ایس ای 4 اس سیریز کے دیگر ماڈلز سے بالکل مختلف ہوگا اور اس کا ڈیزائن آئی فون 14 سے ملتا جلتا ہوگا۔نئے ماڈل میں ہوم بٹن کو ہٹا دیا جائے گا جبکہ اسکرین پر فرنٹ کیمرا نوچ ڈیزائن میں دیا جائے گا۔
ایک اور لیک میں بتایا گیا تھا کہ فون کے اندر ایپل کا نیا اے 18 پراسیسر موجود ہوگا جسے آئی فون 16 کا حصہ بنایا گیا ہے۔اس نئے پراسیسر سے فون کی کارکردگی بہتر ہوگی اس کے علاوہ اے آئی فیچرز بھی صارفین کو دستیاب ہوں گے۔
اگر یہ لیک درست ہوئی تو یہ ایپل کا سستا ترین اے آئی فون ہوگا۔
مختلف رپورٹس میں بتایا گیا ہے کہ اس نئے ماڈل میں 6.06 انچ کا او ایل ای ڈی ڈسپلے دیا جائے گا۔ فون کے بیک پر 48 میگا پکسل کیمرا دیے جانے کا امکان ہے جبکہ فرنٹ میں 12 میگا پکسل کیمرا موجود ہوگا۔
اس نئے ماڈل کی بیٹری بھی پہلے سے زیادہ بڑی ہوگی جبکہ وائی فائی 6، بلیو ٹوتھ 5.3 اور 5 جی سپورٹ بھی دستیاب ہوگی۔چارجنگ کے لیے یو ایس بی سی پورٹ ڈیوائس کا حصہ بنائی جا رہی ہے۔
ایپل کے اس سستے آئی فون کو مارچ 2025 میں متعارف کرایا جاسکتا ہے۔
نئی لیکس کے مطابق یہ فون بلیک اور وائٹ رنگوں میں دستیاب ہوگا۔