ویب ڈیسک: مغربی ہواؤں کی انٹری سے صوبائی دارالحکومت لاہور سمیت ملک بھر میں سردی کی شدت میں اضافہ ہو گیا جبکہ آج سے بارشوں کا سلسلہ بھی شروع ہونے کا امکان ہے۔
محکمہ موسمیات کے مطابق باغوں کے شہر لاہور کا آج کم سے کم درجہ حرارت 9 اور زیادہ سے زیادہ 17ڈگری سینٹی گریڈ تک جانے کا امکان ہے جبکہ شہر میں ہوا کی رفتار 6کلو میٹر فی گھنٹہ ریکارڈ کی گئی ہے۔
موسم کا احوال بتانے والوں کا کہنا ہے کہ آج سے 6 جنوری تک لاہور سمیت پنجاب کے مختلف اضلاع میں بارش کے امکانات ہیں جس سے سردی کی شدت میں مزید اضافہ متوقع ہے۔
ادھر فضائی آلودگی کے اعتبار سے لاہور کا پاکستان میں آج بھی تیسرا نمبر ہے، شہر میں سموگ کی اوسط شرح 216 ریکارڈ کی گئی ہے۔
دوسری جانب آج اسلام آباد وگردونواح میں موسم سرد اور مطلع جزوی ابرآلود رہنے کے ساتھ ہلکی بارش کا امکان ہے۔
شمالی و مغربی بلوچستان، بالائی خیبر پختونخوا ،گلگت بلتستان، کشمیر اورملحقہ پہاڑی علاقوں میں بارش اور برفباری متوقع ہے، رات کے دوران بالائی خیبر پختونخوا میں چند مقامات پر درمیانی سے شدید بارش برفباری کی پیشگوئی کی گئی ہے۔
پنجاب کے زیادہ ترمیدانی علا قوں اور بالائی سندھ میں صبح و رات کے اوقات میں درمیانی سے شدید دُھند چھائے رہنے کی توقع ہے، راولپنڈی، اٹک، جہلم میں بارش جبکہ مری گلیات اور گردو نواح میں ہلکی بارش کیساتھ برفباری بھی متوقع ہے، سندھ کے بیشتر اضلاع میں موسم سرد اورخشک رہنے کا امکان ہے۔
کراچی والے ہوجائیں تیار، 4 جنوری سے سردی کی نئی لہر آئےگی
محکمہ موسمیات نے خبردار کردیا۔ 4 جنوری سے سردی کی نئی لہر سندھ کو اپنی لپیٹ میں لے گی،کئی مقامات پر بارش بھی متوقع ہے۔
محکمہ موسمیات کا کہنا ہے کہ مغربی ہوائیں شمالی بلوچستان اور ملک کے مغربی علاقوں میں داخل ہوگئی ہیں۔ 4 سے5 جنوری کےدوران سندھ کے کئی شہروں میں بارش کا امکان ہے۔
قمبر شہدادکوٹ، لاڑکانہ، جیکب آباد، شکارپور، کشمور اور سکھر سمیت دیگر اضلاع میں چند مقامات پر ہلکی بارش اور بوندا باندی کا امکان ہے۔
سندھ مین رات کے اوقات میں درجہ حرارت 4 سے 7 ڈگری سینٹی گریڈ تک رہنے کا امکان ہے۔
بالائی اور وسطی سندھ کے اضلاع میں رات گئے اورصبح کے دوران دھند کا سلسلہ جاری رہےگا۔